Historiani dhe opinionisti i njohur, Nexhmedin Spahiu, ka folur për zgjedhjet e organizuara nga institucionet e Republikës së Kosovës në veri të Mitrovicës.
Spahiu ka deklaruar se zgjedhjet në Mitrovicën veriore dhe betimi i kryetarit të ri atje është organizuar ashtu siç i ka hije.
Por, i njëjti ka kritikuar marrjen e pozitës së kryetarëve në 3 komunat tjera të veriut.
“Në 3 komunat e tjera, është pikërisht ashtu si nuk duhet të jetë. Së pari është një qyqarllëk i klasit të parë që e dëmton shumë Kosovën, që e humb një shans që na kanë ofruar SHBA, BE dhe lufta në Ukrainë, për me rrumbullaksu dhe me çu deri në fund sovranitetin e Kosovës në të gjithë territorin e saj, në të gjitha komunat e saj”, ka deklaruar Spahiu.
Ai ka kritikuar veprimet që sipas tij janë “qyqare” të kryetarëve të rinj të komunave veriore.
“Veprimet qyqare të këtyre kryetarëve që nuk kanë pasur guximin të shkojnë dhe betohen në objektet përkatëse, e qesin në pah atë patriotizmin fals të shumë vetave në Kosovë, që mundohen ta kompensojnë (patriotizmin) me shkuarje në Boletin, në Prekaj etj. Sigurisht po të ishin pasardhësit e familjes Jashari patriot si ata që kanë rënë dëshmorë për Kosovën, stupcin e fundit shpinës do t’ua jepnin atje përtej Zubin Potokut. E jo me lanë me bo hajgare te varrezat e dëshmorëve dhe me bo ksi marrëzira, pas një qyqarllaku të tillë që kanë shprehur pas rastit të ikjes së detyrave kushtetuese e ligjore që i kanë”, ka deklaruar Spahiu.
Ai ka thënë se nëse kryetarët e ri të zgjedhur në komunat veriore nuk mund të vendosen në objektet përkatëse të komunave që kanë fituar në zgjedhje për t’i udhëhequr, nuk di çfarë pune mund të kryejnë të njëjtit.
Kujtojmë se dje u vendosën në objektet komunale edhe kryetarët e rinj të komunave veriore, veprim ky që u përcoll me protesta dhe kundërshtime të qytetarëve serbë të cilët kanë dalë për të bllokuar rrugët dhe objektet komunale për të mos lejuar mbajtjen e ceremonisë.
E në këto rrethana ka reaguar edhe Policia e Kosovës, e cila ka shpërndarë turmën e qytetarëve për të mundësuar betimin e kryetarëve të rinj, shkruan lajmi.net
Spahiu para 2 ditësh ka thënë se betimi i kryetarëve të rinj të komunave veriore nëpër fshatra trimëron më shumë forcat ekstremiste serbe.
