Presidenti i Greqisë emëroi një kryeministër të përkohshëm të mërkurën për të formuar një qeveri që do ta çojë vendin sërish në zgjedhje më 25 qershor, pas votimit jopërfundimtar të fundjavës së kaluar.
Partia konservatore Demokracia e Re e kryeministrit Kyriakos Mitsotakis fitoi me 40.1% të dielën e kaluar, por nuk arriti një shumicë të plotë. 2 partitë që pasuan refuzuan gjithashtu të formonin një koalicion, duke kërkuar një votim të 2-të më 25 qershor.
Mitsotakis beson se një votim i dytë, i cili i jep partisë drejtuese vende bonus, do t’i japë Demokracisë së Re shumicën e nevojshme për të qeverisur e vetme. Partitë opozitare shpresojnë gjithashtu se një votim i dytë do të rrisë numrat e tyre në zgjedhje. Të mërkurën, presidentja Katerina Sakellaropoulou ftoi liderët e të gjitha partive, pjesa e votave të të cilave kapërceu pragun e 3% për të diskutuar hapat përpara. Ftesa ishte procedurale dhe bisedimet e shkurtra nuk sollën një qeveri koalicioni.
Sipas kushtetutës së Greqisë, nëse bisedimet e koalicionit dështojnë, presidenti emëron një kryeministër të përkohshëm për ta udhëhequr vendin në një votim të përsëritur. Sakellaropoulou emëroi Ioannis Sarmas, një zyrtar i lartë gjyqësor i cili është president i Gjykatës Helenike të Auditimit, një nga tre gjykatat e larta të vendit, në këtë pozicion.
“Është një detyrim kushtetues dhe në të njëjtën kohë detyra ime si qytetar që ta pranoj”- tha Sarmas Sakellaropoulou.
Kreu i partisë komuniste KKE, Dimitris Koutsoumbas u shpreh se zgjedhjet e përsëritura do të mbahen më 25 qershor.
“Ne jemi drejtuar në një qeveri të përkohshme, me zgjedhje në 25 qershor dhe atje do të japim betejën”, tha Koutsoumbas për televizionin shtetëror ERT.
Sipas sistemit zgjedhor të Greqisë, fituesi i një votimi të 2-të pas zgjedhjeve të para jo përfundimtare mund të marrë deri në 50 vende bonus për çdo pikë që fiton mbi 25%. Për të përfituar nga vendet bonus, Demokracia e Re duhet të mbetet partia më e madhe, por kjo duket e mundshme pasi rivali i saj më i afërt, SYRIZA, ka siguruar vetëm një të pestën e votave më 21 maj. Nëse siguron sërish 40% të votave ose edhe pak. më pak, me shumë mundësi do të ketë një shumicë të qartë, shkruan Top Channel.
Gjithsej vendet që do të sigurojë Demokracia e Re varen nga sa parti të tjera do të hyjnë në parlament. Parlamenti i ri, i cili doli nga zgjedhjet e 21 majit do të mblidhet të dielën e ardhshme dhe do të shpërndahet një ditë më vonë përpara se qeveria e përkohshme të marrë drejtimin.
