Austriakët po tregohen skeptikë për integrimin e Kosovës në Bashkimin Evropian.
Kështu së paku thuhet në një sondazh të zhvilluar nga Shoqëria Austriake për Politika Evropiane (ÖGfE), i cili u publikua këtë të premte.
Sekretari i Përgjithshëm i kësaj organizate, Paul Schmidt, në një komunikatë për media, ka thënë se nga shtetet e rajonit të Ballkanit Perëndimor, Bosnja ka shkallën më të lartë të aprovimit për anëtarësim në BE nga qytetarët austriakë.
“Bosnja dhe Hercegovina ende ka shkallën më të lartë të aprovimit për anëtarësim në BE: Sipas studimit, 29 për qind do të mirëprisnin anëtarësimin e këtij vendi, por 41% do ta refuzonin. 24 deri në 21% janë në favor të anëtarësimit të Serbisë, Malit të Zi, Shqipërisë dhe Maqedonisë së Veriut. Por, edhe më pak 16% janë në favor të anëtarësimit të Kosovës”, ka thënë kjo organizatë, shkruan Klankosova.tv.
Ajo që është edhe më shqetësuese në rastin e Kosovës është se shkalla e refuzimit është 53%, që është më e larta nga shtetet e rajonit, e pasuar nga Mali i Zi me 44%.
