Ministri i Jashtëm i Kroacisë, Gordan Grlic Radman, pas takimit me ministren Gërvalla theksoi se Kosova dhe Kroacia janë shtete mike dhe do të vazhdojnë të përforcojnë akoma më shumë marrëdhëniet e tyre, raporton InLajmi.
“Gjithashtu kemi theksuar se Kosova dhe Kroacia janë shtete mike, Kroacia është ndër shtetet e para që e ka pranuar pavarësinë e Kosovës, rezultati është edhe në vizitat bilaterale. Kjo vizitë pas 2 vitesh është që të përforcojmë akoma më shumë marrëdhëniet mes 2 vendeve”, tha ai.
Grlic Radman shprehu mbështetje për anëtarësimin e Kosovës në organizata ndërkombëtare ndërsa përshendeti vendimin për liberalizimin e vizave për Kosovën.
“Në bisedë gjithashtu e dhashë mbështetjen e Kroacisë për anëtarësimin e Kosovës në të gjitha organizatat ndërkombëtare, gjithashtu kemi përshëndetur liberalizimin e vizave për Kosovën”, tha ministri kroat.
Ministri kroat shpreson se Kosova do të anëtarësohet së shpejti në Këshillin e Evropës derisa theksoi se Kroacia do të japë një kontribut të veçantë në këtë drejtim.
“Gjithashtu e përshëndesim vendimin e Këshillit të Evropës. Shpresoj se kjo do të rregullohet në një periudhë të shpejt dhe ta shohim Kosovën anëtare së shpejti. Ky do të jetë hap i madh për Kosovën, si dhe Kroacia mund të japë kontribut të veçantë”, tha ai.
Grlic Radman pret avancim të marrëdhënieve Kosovë-Serbi ndërsa shpreson që çështja e të zhdukurve të luftës të zgjidhet sa më shpejt.
“Për dialogun Kosovë-Serbi presim avancim të marrëdhënieve, të gjitha palët presin hapat të mëtejmë. Lidhur me këtë përshëndesim marrëveshjen e fundit Kosovë-Serbi për personat e pagjetur. Shpresoj se do të zgjidh problemet me personat e pagjetur. Kroacia që 30 vite është duke kërkuar mbi 3.000 persona të zhdukur”. /InLajmi/
