Më 27 prill shënohet Dita e të Pagjeturve në Kosovë, për t’i kujtuar, por edhe për të ngritur vetëdijen për angazhim më të fuqishëm në zbardhjen e fatit të të zhdukurve me dhunë gjatë luftës në Kosovë, shkruan InLajmi.
Fati i 1.600 të zhdukurve me dhunë gjatë luftës në Kosovë edhe pas 2 decenieve mbetet ende plagë e hapur, jo vetëm e familjarëve, por e shoqërisë dhe institucioneve, ndërsa kjo e fundit pavarësisht përpjekjeve për zbardhjen e fatit të tyre ka qenë peng i “injorimit” nga ana e Serbisë për të bashkëpunuar në këtë drejtim.
Kryetarja e shoqatës “Thirrjet e Nënave” Nistrete Kumnova, një zë i fuqishëm për çështjen e të pagjeturve, thotë se shpresat kryesore tani i ka te Qeveria e Kosovës në udhëheqjen e kryeministri Albin Kurti për zbardhjen e fatit të të zhdukurve të luftës.
Kumnova thekson se deri tani është punuar pak për çështjen e të pagjeturve ndërsa shton se adresat, personat dhe vendet ku janë dërguar të zhdukurit e luftës dihen, por që si pasojë e mosangazhimit institucional ka mbetur e pazgjidhur kjo çështje deri tani dhe Serbia i ka ruajtur këto të dhëna në arkivat e saj.
“Unë besoj që institucionet tona tash në udhëheqjen e kryeministrit Kurti janë më shumë të interesuar për të punuar për zbardhjen e çështjes së të pagjeturve. Deri tash pak është punuar pak për të zhdukurit e luftës, duke qenë se adresa, personat dhe vendi ku janë dërguar dihen, por Serbia i ka mbajtur të fshehura”, tha Kumnova.
Kumnova kërkon që çështja e të pagjeturve të trajtohet me seriozitet edhe nga ndërkombëtarët, në mënyrë që t’i ushtrohet presion Serbisë që t’i hapë arkivat dhe të zgjidhet kjo çështje, e cila është plagë e hapur edhe për Kumnovën, ngaqë djali i saj është njëri nga 1.600 personat e zhdukur me dhunë gjatë luftës në Kosovë.
“Për çështjen e të pagjeturve edhe ndërkombëtarët duhet të bëjnë më shumë sepse adresa dihet, në mënyrë që ata të kthehen prej varrezave të Serbisë”, tha Kumnova.
Kryetarja e shoqatës “Thirrjet e Nënave” pret shumë nga takimi i 2 majit mes Kurtit dhe Vuçiqit, duke thënë se institucionet tona tani duhet të japin maksimumin.
“Unë jam një nënë e një djali që është zhdukur në luftë dhe ende nuk më është kthyer. Edhe djali im është në mesin e mijëra të pagjeturve, duke u mbajtur peng i vdekur. Shpresoj që institucionet tona tash e tutje ta japin maksimumin dhe çështja e të pagjeturve të zbardhet”,tha ajo. Shqipe Vishaj /InLajmi/
