Presidentja e Republikës së Kosovës, Vjosa Osmani ka kujtuar masakrën e Mejës, përcjell InLajmi.
“Në Mejë ka ende varre të hapura, ka nëna që vijnë aty dhe qajnë pranë varrit të zbrazët, sepse regjimi serb ende i mban të fshehura të dhënat për vendndodhjen e të vrarëve të Mejës e të gjithë Kosovës”, ka thënë presidentja Osmani.
Osmani tha se masakra e Mejës është një ndër masakrat më të tmershme të regjimit serb ndaj popullit shqiptar.
“Sot kujtojmë njërën ndër masakrat më të tmerrshme të regjimit serb ndaj popullit shqiptar të Kosovës, atë të Mejës, në të cilën 376 burra të moshës 15 deri në 75 vjeç, 36 nga të cilët nën 18-vjeç, u ekzekutuan nga polica dhe ushtria serbe”, tha ajo.
Presidentja theksoi se regjimi serb vrau e zhduki kufomat e qytetarëve të pafajshëm të vendit tonë ndërsa shtoi se Serbia po vazhdon të jetojë mbi krimet e kryer nga shteti i tyre pa e vrarë ndërgjegjen dhe pa u kërkuar falje viktimave.
“Meja është dëshmia e pamohueshme e një synimi të tmerrshëm të një shteti për vrasjen kolektive të një populli, por edhe thirrja e përhershme e jona për ta artikuluar kumbueshëm thirrjen tonë për drejtësi. Në Mejë ka ende varre të hapura, ka nëna që vijnë aty dhe qajnë pranë varrit të zbrazët, sepse regjimi serb ende i mban të fshehura të dhënat për vendndodhjen e të vrarëve të Mejës e të gjithë Kosovës.”, tha ajo. /InLajmi/
