Komiteti i Ministrave të Këshillit të Evropës mbështeti vendimin për fillimin e procedurës për anëtarësimin e Kosovës në këtë organizatë ndërkombëtare, ndërsa ministri i Jashtëm, Ivica Daçiq, tha se ngjarjet që pasuan tregojnë se asgjë nuk ishte sipas procedurave normale, por ishte diçka ekskluzive që Kosova të shpërblehe, ndërsa theksoi ai se shtrohet pyetja se për çfarë duhet të shpërblehet Kosova transmeton InLajmi.
“A është ky një shpërblim për mosformimin e Asociacionit për 10 vjet? Si nuk u deklarua Këshilli i Evropës se duhet të formohet Asociacioni, sepse atë e ka nënshkruar Catherine Ashton në emër të BE-së”, tha Daçiq.
Ai tutje theksoi se me pranimin e aplikimit të Kosovës për anëtarësim në KiE, është shkelur Statuti i Këshillit të Evropës, sepse diçka që nuk është shtet nuk mund të jetë anëtare e Këshillit të Evropës.
Daçiq tha se është e qartë se Gjermania i ka premtuar Kurtit se do ta shpërblejnë për konstruktivitet.
“Këtu tregohet se kush është i preferuari i disa vendeve perëndimore, në këtë rast QUINT-it. Ata thyen një sërë rregullash, Islanda ka qenë kundër këtij votimipër një kohë të gjatë. Ajo donte t’ia linte Letonisë për presidencën e ardhshme. Më pas kërkuan një mbledhje urgjente me një pikë të vetme në rend dite. Komisioni i Ministrave u takua vetëm për një pikë të rendit të ditës dhe kjo nuk ka ndodhur ansjëher që të mblidhet në javën kur mbahet Asambleja Parlamentare e Këshillit të Evropës”, tha Daçiq.
Tutje shtoi Daçiq se fakti që Kurti i kushtëzoi me gjoja konstruktivitet dhe se kërkon të diskutojë për Asociacionin, është “qesharake, hipokrite, e vrazhdë”.
I ftuar në RTS mëngjesin e së martës, Ivica Daçiq tha se mbrëmë e ka telefonuar presidenti Aleksandar Vuçiq dhe se kanë diskutuar se çfarë të bëjnë tutje.
Daçiq falënderon Hungarinë e cila edhe pse e ka njohur Kosovën ka votuar kundër pranimit të aplikimit të Kosovës në Këshillin e Evropës. /InLajmi/
