Ish-kryeministri i Kosovës Isa Mustafa, ka shprehur mbështetje për “Marshin për Drejtësi”, i cili do të mbahet më 2 prill për ish-krerët e UÇK-së që po mbahen në paraburgim në Hagë, përcjell InLajmi.
Mustafa thekson se lufta e UÇK-së meriton respekt dhe përkrahje, ashtu siç meritojnë drejtësi luftëtarët e saj.
Për më tepër, ai thotë se “Kosova sot është e lirë falë luftës së UÇK-së, mençurisë politike të Ibrahim Rugovës dhe ndërhyrjes së NATO-s”.
Ndërsa kujtoi kontribuuesit e lirisë dhe pavarësisë së Kosovës, Mustafa tha se marshi për drejtësi meriton përkrahje e solidarizim.
Postimi i plotë i tij:
“Marshojmë për Drejtësi”, një manifestim që meriton përkrahje e solidarizim!
Meriton respekt e përkrahje lufta e UÇK-së dhe meritojnë drejtësi luftëtarët e saj që dolën në ballë për të ndalur masakrat e shtetit serb dhe gjenocidin ndaj shqiptarëve. Kosova sot është e lirë falë luftës së UÇK-së, mençurisë politike të Ibrahim Rugovës dhe ndërhyrjes së NATO-s. Kemi qenë bashkë në kohërat më të vështira; jemi solidar sot me të gjithë ata që kontribuuan për liri e pavarësi dhe me ata që ishin shembull i gatishmërisë për të zbardhur çdo dyshim në luftën e drejtë dhe të pastër, sepse besonin në Drejtësi!
Me mendje jam me ju që do të marshoni për Drejtësi. /InLajmi/
