Në javën e shënimit të “Epopesë së Dukagjinit”, kreu i Aleancës për Ardhmërinë e Kosovës Ramush Haradinaj, ka vizituar panairin e librit dhe njëkohësisht ka marrë pjesë në promovimin e librit “Komiteti i Deçanit” nga profesor Hasan Ukëhaxhaj, përcjell InLajmi.
Haradinaj thotë se rezistenca dhe mbrojtja e të drejtave gjatë okupimit për shqiptarët nuk ka qenë e lehtë sepse sipas tij, ajo barte pasoja për individin por edhe për rrethin e tij.
Tutje, ai theksoi se Komiteti i Deçanit, intelektualët e atdhetarët e atij brezi ishin motiv për shumë figura.
Sipas Haradinaj, dokumentimi i këtyre ngjarjeve historike do t’i shërbejë brezave të ardhshëm për informimin dhe vetëdijësim për rolin e shumë gjeneratave që kanë dhënë kontribut të madh për çështjen kombëtare.
Postimi i plotë i tij:
Rezistenca dhe mbrojtja e të drejtave gjatë okupimit, për shqiptarët nuk ka qenë e lehtë sepse ajo barte pasoja për individin por edhe për rrethin e tij. Lëvizjet e hershme të rezistencës, frymëzuan gjeneratat pasuese për më shumë guxim në përpjekjet për liri.
Sot në Deçan, në javën e shënimit të “Epopesë së Dukagjinit”, kisha kënaqësinë të vizitoj panairin e librit dhe njëkohësisht të marr pjesë në promovimin e librit “Komiteti i Deçanit” nga veprimtari i çështjes kombëtare, njëri prej themeluesve të Komitetit të Deçanit – LNÇKVShJ, Profesori Hasan Ukëhaxhaj, i cili trajton gjendjen e rënduar të shqiptarëve në shekullin XX, e cila ka pasur pasoja të thella në zhvillimin, avancimin dhe shtetndërtimin e kombit shqiptar si tërësi.
Nuk ishte rastësi që protagonistët e asaj kohe kanë bartur mbi supe vlera të çmuara atdhetare, duke frymëzuar shumë gjenerata tjera, jo vetëm në Deçan por edhe në viset e tjera. Komiteti i Deçanit, intelektualët e atdhetarët e atij brezi ishin motiv për shumë figura për të guxuar për më shumë.
Dokumentimi i këtyre ngjarjeve historike do t’i shërbejë brezave të ardhshëm për informimin dhe vetëdijësim për rolin e shumë gjeneratave që kanë dhënë kontribut të madh për çështjen kombëtare. /InLajmi/
