Ish-kryeministri i Kosovës, Avdullah Hoti ka reaguar pasi Shtetet e Bashkuara të Amerikës janë shprehur të shqetësuara lidhur me deklaratat e bëra nga opozita për kundërshtimin e propozimit evropian, përcjell InLajmi.
Hoti tha se forca politike aktuale që po e udhëheq me vendin i ka mashtruar qytetarët për 15 vite duke i cekur disa nga veprimet e kësaj qeverie, duke filluar nga kundërshtimi i Planit të Ahtisarit , kundërshtimin e Marrvëveshjes së Stabilizim-Asocimit, kundërshtimin me dhunë marrëveshjen e parimeve të vitit 2015, etj.
Ai shtoi se LDK-ja është kundër mashtrimi, dhe së është për ruajtjen e partneritetit me miqtë, duke e përmbyllur se kjo parti është për shtetin e Kosovës.
Postimi i plotë i tij:
LDK-ja është kundër mashtrimit, e jo kundër partnerëve të shtetit të Kosovës.
Forca politike që udhëheq me vendin i ka mashtruar qytetarët për 15 vite, sepse:
– e ka kundërshtuar Planin e Ahtisarit që ka sjellë pavarësinë;
– e ka kundërshtuar Marrëveshjen e Stabilizim-Asocimit që ka trasuar rrugën e integrimit evropian të Kosovës;
– e ka kundërshtuar Marrëveshjen e Uashingtonit të nënshkruar në Shtëpinë e Bardhë, e cila e ka sjellë njohjen nga Izraeli dhe përfitime të tjera;
– e ka kundërshtuar me dhunë marrëveshjen e demarkacionit me Malin e Zi, pavarësisht thirrjes nga zyrtarët më të lartë të SHBA-së për të mbështetur atë, e sot e konsideron demarkacionin si çështje të kryer;
– i ka kundërshtuar të gjitha marrëveshjet e dialogut në 10 vitet e fundit, disa prej të cilave kanë mundësuar shtrirje të sovranitetit në të gjithë territorin e vendit dhe i kanë siguruar Kosovës prezencë në forume ndërkombëtare;
– e ka kundërshtuar me dhunë marrëveshjen e parimeve të vitit 2015, e cila siguron zbatim të Kushtetutës së Kosovës në zbatimin e marrëveshjes së vitit 2013.
Ndërkaq, tani e njëjta forcë politike pranon të zbatoj të gjitha marrëveshjet paraprake dhe thirret në elemente specifike të atyre marrëveshje që sigurojnë kushtetutshmërinë në zbatim.
LDK-ja është kundër mashtrimit.
LDK-ja është për shtetin e Kosovës.
LDK-ja është për ruajtje të partneritetit me miqtë./InLajmi/
