Byroja Kosovare e Sigurimit ka njoftuar të gjithë bashkëatdhetarët se mjetet e regjistruara në vendin e huaj mund të marrin pjesë në trafik vetëm 3 muaj nga data e hyrjes në Kosovë përndryshe parashihen gjoba sipas ligjit 05/L-132, përcjell InLajmi.
Zyrtarë nga BKS u bëjnë thirrje bashkëatdhetarëve që të respektojnë këtë ligj, si dhe u rekomandon atyre që gjatë ardhjes në Kosovë të marrin online policën e sigurimit kufitar, në mënyrë që të mos presin në sportelet e BKS-së nëpër pikat kufitare.
Ndryshe, ky njoftim është i vendosur dhe theksuar me ngjyrë të kuqe në pikat kufitare të lëshuara nga Byroja Kosovare e Sigurimit.
Njoftim i plotë nga BKS:
Byroja Kosovare e Sigurimit (BKS) njofton të gjithë bashkatdhetarët, respektivisht policë mbajtësit se në kuptim të nenit 41 të ligjit numër 05/L-132 për Automjete, mjeti i regjistruar në vendin e huaj, në pronësi të shtetasit të huaj me qëndrim të përkohshëm në Kosovë, mund të marrë pjesë në trafikun rrugor të Kosovës jo me gjatë se 3 muaj nga data e hyrjes në Kosovë, pavarësisht se vlefshmëria e policës së sigurimit mund të jetë më e gjatë.
Byroja Kosovare e Sigurimit apelon të bashkatdhetarët që të respektojnë ligjin pasi që në të kundërtën sipas pikës 5 të nenit 41 parashihet gjobë ndaj qytetareve që bien ndesh me ligjin.
Gjithashtu Byroja Kosovare e Sigurimit rekomandon bashkatdhetarët që gjatë ardhjes në Kosovës mund ta marrin online policën e sigurimit kufitar, për të mos pritur fare në sporteret e BKS-së nëpër pikat kufitare.
Ky njoftim është i vendosur dhe theksuar në ngjyrë të kuqe në policat e sigurimit kufitar të lëshuara nga Byroja Kosovare e Sigurimit. /InLajmi/
