Bash në ditën e të dashuruarve 14 shkurti, në krye të Qeverisë së Kosovës para 2 vitesh erdhi Albin Kurti si rezultat i fitores bindëse të Vetëvendosjes në zgjedhjet parlamentare, raporton InLajmi.
Në këto 2 vite qeverisje ishte Kurti ai i cili u kritikua, u përqesh e nganjëherë edhe u duartrokit.
Partia Socialdemokrate në këtë 2 vjetor të Qeverisë së Kosovës, kanë zhvilluar një aksion simbolik para objektit të qeverisë, duke shprehur kështu pakënaqësinë ndaj qeverisjes Kurti.
PSD-ja aksionin simbolik e filloi para objektit të qeverisë, duke vizatuar një vijë të verdhë, që simbolizon mos punën e qeverisjes.
Nënkryetari i PSD-së, Zgjim Hyseni u shpreh se Qeveria nuk arriti të kryej as edhe një punë në 2 vite qeverisje, prandaj nuk ia ka bërë vijë punës e asnjë premtim nuk e ka realizuar.
Tutje ka shtuar Hyseni se vetëm rrahje gjoksi, rritje mendje e vetëm fjalë, asgjë më shumë nuk u pa nga Kurti në këto 2 vite.
“Rrahje gjoksi e rritje e mendjes; shumë fjalë, shumë numra, shumë shifra. Para 2 vjetëve na thanë se ndodhi diçka e madhe, e jashtëzakonshme. A e dini çfarë ndodhi para 2 vjetëve? Bash asgjë”, tha Hyseni.
Tutje ai nuk e pati problem t’ia numëroi kryeministrit premtimet për 160 çerdhe dhe 2.000 banesat për çifte, të cilat nuk u bënë kurrë.
“I kanë premtuar 160 çerdhe të reja. Nuk është asnjë. Nuk ia kanë ba vijë. I kanë premtuar 2000 banesa për çifte të reja. Nuk kemi as gurthemel. Nuk ia kanë ba vijë”, tha ai.
Hyseni përmendi kështu edhe premtimin e kryeministrit Kurti për rpërmirësimin e gjendjes në shëndetësi , por në këtë sektor tha ai nuk u bë asgjë përveç se u shtuan problemet.
“Kanë premtuar rregullim të shëndetësisë. Kanë thënë s’do të ketë mungesë barnash, dhe do të fillojnë sigurimet shëndetësore. Nuk ia kanë ba vijë. Gjendja është veç më e rëndë”, ka thënë Hyseni./InLajmi/
