Ministri i Mbrojtjes Armend Mehaj bëri të ditur se kontingjenti i FSK-së po realizon me sukses të lartë operacionin e kërkim-shpëtimit në Turqi pas tërmetit shkatërrimtar, përcjell InLajmi.
Mehaj deklaroi se ata që nga orët e hershme të mëngjesit janë duke operuar në provincën Hatay të Turqisë.
Tutje ai shtoi se rajoni Hatay në Turqi ku po operojnë njësitet tona është rajoni më i goditur.
Postimi i plotë i tij:
Kontingjenti ynë po realizon me sukses të lartë operacionin e kërkim-shpëtimit në Turqi pas tërmetit shkatërrimtar
Kontingjenti i FSK-së në Republikën e Turqisë që nga orët e hershme të mëngjesit është duke operuar në provincën Hatay të Turqisë në mbështetje të autoriteteve turke për kërkimin dhe shpëtimin e jetërave të njerëzve nën gërmadha.
Specialistët e kërkim-shpëtimit urban dhe ekipet e mjekësisë emergjente dhe ata K9, të zbarkuar para 2 ditësh në Republikën e Turqisë, me përkushtim dhe profesionalizëm të lartë janë duke zhvilluar operacionet e kërkim -shpëtimit në koordinim me autoritetet turke dhe ekipet e shpëtimit nga vende të ndryshme të botës.
Rajoni Hatay në Turqi ku po operojnë njësitet tona është rajoni më i goditur. /InLajmi/
