Kreu i AAK-së Ramush Haradinaj, i cili aktualisht ndodhet në vizitë zyrtare në SHBA, ka thënë se diskutimet për Asociacionin e komunave me shumicë serbe kanë vetëm një synim, e që është heqja e pengesave drejt marrëveshjes finale me Serbinë, përcjell InLajmi.
Haradinaj thotë se ata që po kundërshtojnë këtë marrëveshje nuk e kanë hallin te asociacioni, por po e përdorin këtë të fundit për të kundështuar marrëveshjen e madhe.
Sipas tij, këtë po e bën Serbia edhe kryeministri i Kosovës Albin Kurti.
Kreu i AAK-së thekson se kjo lojë politike duhet të marrë fund dhe Asociacioni duhet të zbatohet në përputhje me Kushtetutën e Kosovës në koordinim me SHBA-në dhe BE-në.
Postimi i plotë i tij:
Diskutimet dhe konsultat për Asociacionin kanë vetëm një synim, heqjen e pengesave të fundit drejt marrëveshjes së madhe me Serbinë, për njohje të ndërsjellë.
Ky është një obligim i marrë që duhet të zbatohet në përputhje me kushtetutën e Kosovës dhe këtu çështja mbyllet.
Prandaj të gjithë ata që asociacionin e paraqesin si çështje problematike, nuk e kanë hallin te asociacioni, por duan që asociacionin ta përdorin si “mbulesë” për ta kundërshtuar marrëveshjen e madhe.
Këtë po e bën Serbia e fatkeqësisht këtë po e bën edhe Kryeministri i Kosovës.
Të gjitha vendimet dhe veprimet e qeverive në Prishtinë e në Beograd, në këta 4-5 muajt e fundit, që nga çështja e targave, tensionet në veri, dalja nga institucionet e serbëve lokalë, e deri te shpallja e zgjedhjeve në veri, kanë qenë obstruksionizëm i Planit Evro-Amerikan.
Kjo lojë politike duhet të marrë fund dhe Kosova duhet t’i fokusojë krejt potencialet politike, intelektuale e qytetare në kryetemën e saj që është “marrëveshja e madhe për njohje të ndërsjellë me Serbinë”, e cila mund të arrihet vetëm duke qenë të koordinuar ngushtë me SHBA dhe BE. /InLajmi/
