Kryetari i LDK-së Lumir Abdixhiku, ka vizituar njërin nga tregjet e Prishtinës për produkte bazike ushqimore, ku edhe ka folur me qytetarët, të cilët i kanë shprehur shqetësimin për ngritjen e çmimeve, përcjell InLajmi.
Abdixhiku thotë se çmimet e larta janë bërë të papërballueshme për qytetarët e Kosovës.
Tutje, ai thekson se norma mesatare e inflacionit në Kosovë ka arritur në mbi 20%, përderisa çmimet e produkteve bazike janë rritur për mbi 50%.
Sipas të parit të LDK-së, Qeveria e Kosovës deri tani nuk ka ofruar asnjë zgjidhje për të ndihmuar qytetarët të tejkalojnë këtë krizë që e ka përfshirë vendin.
Abdixhiku thotë se TVSH-ja duhet të hiqet në produktet bazike, si dhe të ulet çdo barrë tatimore dhe të rriten pagat në përputhje me inflacionin
Postimi i plotë i tij:
Këtë mëngjes, në Prishtinë, në njërin nga tregjet e pemëve, perimeve e produkteve bazike, takova qytetarë që na thonë të njëjtën gjë: kostoja e jetesës është bërë e papërballueshme.
Me këtë pushtet, mijëra njerëz po përpiqen fort t’i bëjnë ballë rritjes së paprecedentë të çmimeve. Përgjatë dy viteve të shkuara, norma mesatare e inflacionit në Kosovë ka arritur në mbi 20%, përderisa çmimet e produkteve bazike janë rritur për mbi 50%. Kaq shumë ndryshim në kaq pak kohë, nuk ka patur asnjëherë. Pavarësisht kësaj rritjeje, Qeveria nuk ka ofruar asnjë zgjidhje dhe jetën e dinjitetshme që familjet kosovare e meritojnë.
Propozimet e LDK-së janë refuzuar deri më tani jo sepse nuk ishin adekuate, por sepse ishin të LDK-së.
Nuk mund të vazhdojmë kështu. Duhet të heqim TVSH-në në produktet bazike, të ulim çdo barrë tatimore tani, dhe t’i rrisim pagat në përputhje me inflacionin. Ky është plani i LDK-së, një plan në anën e familjeve dhe njerëzve punëtorë. /InLajmi/
