Gjatë të premtes FIFA dënoi përfaqësuesen serbe me 50.000 franga për sjellje jo të mirë ndaj futbollisteve shqiptarë, përcjell InLajmi.
Për këtë vendim reagoi Federata e Futbollit e Kosovës e cila mirëpriti faktin që janë marrë në konsideratë ankesat dhe vërejtjet e saj drejtuar Komisionit Disiplinor të FIFA-s.
Më tej nga FFK treguan se do reagojnë sa herë që ka sjellje të tilla josportive dhe fyerje në drejtim të Kosovës.
Njoftim i plotë i Federatës së Kosovës:
Federata e Futbollit e Kosovës mirëpret faktin që janë marrë në konsideratë ankesat dhe vërejtjet e saj drejtuar Komisionit Disiplinor të FIFA-s, lidhur me fyerjet dhe sjelljet josportive të futbollistëve, zyrtarëve dhe tifozëve të ekipit të Serbisë kundër shqiptarëve dhe Kosovës, gjatë ndeshjeve në kuadër të Kupës së Botës “Katari 2022”.
FFK në vazhdimësi, sa herë që ka sjellje të tilla josportive dhe fyerje në drejtim të Kosovës dhe popullit të saj, që bien ndesh me rregullativën e FIFA-s dhe UEFA-s, do të reagojë në këto instanca me argumente e dëshmi dhe bazuar në aktet normative, ngase veprimet e tilla, të kujdoqofshin, janë kundër vlerave që përçon dhe promovon futbolli dhe si të tilla duhet të ndëshkohen. /InLajmi/
