Ish-ministri slloven i Mbrojtjes, Roman Jakiq thotë se Rusia dhe Serbia janë partnerë që kontribuojnë për destabilizimin e vendeve të Ballkanit Perëndimor.
Jakiq në një intervistë për The Geopost thekson se duhet pasur kujdes nga mediat që promovojnë narrativën pro-ruse në këto anë.
“Rusia dhe Serbia janë partnerë shumë të mirë dhe supozoj se përmes Serbisë po destabilizojnë jo vetëm Bosnjën e Hercegovinën, Malin e Zi dhe Kosovën, por edhe vendet e tjera të rajonit”, thekson Jakiq.
“Është interesante se narrativa në Serbi është se Rusia po e ndihmon Serbinë, por në thelb nëse shikoni shifrat dhe ndryshimin në tregti, mund të shihni se Serbia ka pjesën më të madhe me BE-në, më shumë se 70% me Gjermaninë dhe Italinë dhe se tregtia me Rusinë është më e vogël”, shton ai.
Sipas tij, faktori ndërkombëtar duhet të përgjigjet për sigurinë e qytetarëve në Kosovë, transmeton Gazeta10
“Mendoj se janë 2 faktorë shumë të rëndësishëm ndërkombëtarë, përkatësisht KFOR-i dhe EULEX-i, të cilët gjithashtu duhet të kujdesen për sigurinë e njerëzve dhe se ky tension në rritje duhet të zgjidhet përmes dialogut ndërmjet Kosovës dhe Serbisë”, pohon ai.
