Gripi sezonal ёshtё njё sёmundje infektive qё pёrhapet nga personi nё person nёpёrmjet kollёs, teshtimёs dhe kontakteve tё ngushta. Ky grip veçse ka filluar të përhapet në numër të madh ose në formë epidemie gjatë periudhës së dimrit, shkruan InLajmi.
Në këtë periudhë përveç gripit sezonal të shpeshta janë edhe infeksionet me viruse të traktit respiratorë, që kanë simptoma të ngjashme.
Andaj mënyra më efikase për ta parandaluar infeksionin apo ndërlikimet si pasojë e gripit është vaksinimi.
Vaksinimi kundër gripit nuk paraqet një garancë 100% se personi i vaksinuar nuk do të sëmuret, por që do e kalojë atë në një formë më të butë dhe me një rrezik dukshëm më të ulët nga ndërlikimet e mundshme.
Sigurimi i vaksinave gjatë periudhës së dimrit fillon të bëhet problem kryesor, pasi këto vaksina duhet të sigurohen nga jashtë vendit, e kjo varet nga menaxhimi që bën Ministria e Shëndetësisë për sigurimin e sasisë së mjaftueshme për qytetarët.
Se sa vaksina janë siguruar deri tani, Ministria e Shëndetësisë së Kosovës në një përgjigje për InLajmin thotë se janë siguruar 85.000 vaksina kundër gripit sezonal për qytetarët, si dhe shpërndarja e tyre ka filluar të bëhet në të gjitha Qendrat e Mjekësisë Familjare.
Nga Ministria e Shëndetësisë njoftojnë gjithashtu se vaksinimi kundër gripit sezonal në Kosovë ka filluar me datën 31 tetor dhe deri me tani janë administruar rreth 70.000 doza, derisa theksojnë se procesi i vaksinimit është duke vazhduar ende, për çka edhe interesimi i qytetarëve për vaksinim është i kënaqshëm.
“Vaksinimi kundër gripit sezonal në Kosovë ka filluar me datën 31 tetor dhe deri me tani janë administruar rreth 70.000 doza, ndërsa procesi i vaksinimit është duke vazhduar ende”.
Nga Qendra Kryesore e Mjekësisë Familjare në Prishtinë, bëhet e ditur se numri total i të vaksinuarve prej tetorit e deri më sot në të gjitha qendrat e tjera mjekësore është 10.600.
Doktoresha Gjevë Canolli nga QKMF tha për Gazetën InLajmi, se përveç vaksinimit në qendër, ekipet mobile kanë ofruar shërbimin e vaksinimit në shtëpi për 100 qytetarë, të cilët janë me sëmundje kronike dhe e kanë pasur të pamundur vaksinimin në qendër.
Tutje, Canolli thekson se moshat më të interesuara për vaksinim janë personat mbi 65 vjet.
“Mosha më të interesuara për vaksinim kanë qenë personat me moshë të shtyer mbi 65 vjet, mirëpo kemi pasur edhe mosha më të reja”, tha ajo për InLajmin.
Sipas zyrtarëve të Qendrës Kryesore të Mjekësisë Familjare, interesimi i qytetarëve për vaksinim kundër gripit sezonal është i kënaqshëm, ndërsa dozat e vaksinës përmbushin kërkesat aktuale.
Sipas të dhënave zyrtare në Qendrën Kryesore të Mjekësisë Familjare bëhet e ditur se brenda muajit dhjetor në këtë qendër si raste të dyshuara me grip sezonal janë paraqitur 1.990 raste. Pak më shumë raste ka pasur gjatë muajit të kaluar.
“Për muajin dhjetor janë paraqitur 1.990 raste të dyshimta me grip sezonal. Ndërsa për muajin nëntor 2.315 në nëntor”.
Ndryshe, Ministria e Shëndetësisë dhe Instituti Kombëtar i Shëndetësisë Publike, me mbështetjen e Organizatës Botërore të Shëndetësisë kanë nisur një aktivitet shtesë me qëllim të promovimit të vaksinimit kundër gripit sezonal dhe kundër Covid-19, i quajtur “Karvani i vaksinimit”. Shqipe Vishaj /InLajmi/
