Kryeministri i Republikës së Kosovës, Albin Kurti të enjten udhëtoi në Pragë të Çekisë për të dorëzuar aplikimin e Republikës së Kosovës në Bashkimin Evropian, u prit sot në një takim bilateral nga ministri i Punëve të Jashtme të Çekisë, Jan Lipavský, përcjell InLajmi.
U diskutua për marrëdhëniet dypalëshe dhe për bashkëpunimin e afërt ndërmjet 2 vendeve, veçanërisht gjatë Presidencës çeke të Këshillit të Bashkimit Evropian.
Kurti e falënderoi Republikën e Çekisë dhe Lipavský për mbështetjen e vazhdueshme dhe të zëshme që i kanë dhënë Kosovës në synimet e saj për integrim evropian dhe euro-atlantik.
Ai veçoi rolin e rëndësishëm dhe përkushtimin e Presidencës çeke të Këshillit të BE-së në trajtimin me prioritet të çështjes së liberalizimit të vizave. Dje, Këshilli i BE-së dhe Parlamenti Evropian u dakorduan për heqjen e regjimit të vizave për qytetarët e Republikës së Kosovës më së largu me një janar 2024.
Në takim gjithashtu u fol edhe për bashkëpunimin rajonal, marrëveshjet që u nënshkruan në kuadër të Procesit të Berlinit dhe procesin e dialogut ndërmjet Kosovës dhe Serbisë./InLajmi/
