Krerët e shtetit, presidentja Vjosa Osmani dhe kryeministri Albin Kurti kanë thënë se para vitit të ri do të dorëzojnë aplikimin e Republikës së Kosovës për anëtarësim në Bashkimin Evropian.
Por a është koha ideale që Kosova ta bëjë një gjë të tillë dhe a e ka përkrahjen e Gjermanisë si një prej shteteve më të fuqishme dhe më me influencë brenda BE-së?
Ambasada e Gjermanisë në Prishtinë ka thënë se i takon Kosovës të vendos se kur është koha e duhur për të bërë aplikimin formal, por thonë se duhet pasur në konsideratë faktin që 5 shtete të BE-së ende s’e kanë njohur Kosovën si shtet dhe kjo paraqet një pengesë serioze në procesin e anëtarësimit.
“I takon Kosovës të vendos rreth asaj se kur është koha e duhur për aplikimin formal. Por është e nevojshme të merret në konsideratë se është fakt që 5 shtete anëtare të BE-së ende nuk e kanë njohur Kosovën si shtet sovran dhe të pavarur. Kjo do të përbëjë një pengesë të konsiderueshme për procesin e anëtarësimit”, kanë thënë nga Ambasada e Gjermanisë në Prishtinë.
Nga Ambasada e Gjermanisë theksojnë se sigurisht që duan që Kosova të bëhet anëtare e Bashkimi Evropian, por theksojnë se anëtarësimi i Kosovës në BE kërkon edhe përparim të mëtejshëm në fushën e sundimit të ligjit, luftën kundër korrupsionit meqë do të jenë pjesë e procesit të anëtarësimit.
“Qëndrimi ynë është i qartë. Ne dëshirojmë që Kosova të bëhet anëtare e BE-së. Qeveria gjermane e nënvizon qartë këtë perspektivë për të gjashtë vendet e Ballkanit Perëndimor. Anëtarësimi i Kosovës në BE kërkon përparim të mëtejshëm, duke përfshirë reformat në fushën e sundimit të ligjit, kundër korrupsionit dhe krimit të organizuar, pasi ato do të jenë pjesë e procesit të anëtarësimit. Ato gjithashtu do të japin perspektiva për njerëzit e rajonit dhe do të përmirësojnë kushtet për investime dhe rritje ekonomike”, thuhet në përgjigje e Amabasadës.
Përveç këtyre, potencojnë se është esenciale edhe që të arrihet progres në dialogun me Serbinë për një marrëveshje gjithëpërfshirëse.
“Duke pasur parasysh të gjitha këto, arritja e përparimit në Dialog drejt një normalizimi gjithëpërfshirës të marrëdhënieve me Serbinë është thelbësore. I bëjmë thirrje Kosovës dhe Serbisë që të angazhohen në mënyrë konstruktive në dialogun e lehtësuar nga BE-ja”, kanë theksuar nga Ambasada e Gjermanisë në Prishtinë.
Se Kosova duhet të bëjë përparim në dialog dhe më pas të merret me çështjen e aplikimit për anëtarësim në Bashkim Evropian e kishte thënë gjatë vizitës së saj të parë në Prishtinë edhe kryediplomatja gjermane, Analena Baerbock. Shefja e diplomacisë gjermane kishte thënë se para aplikimit për anëtarësim vjen dialogu për normalizim të raporteve me Serbinë, shkruan Gazeta Express.
Kryeministri i Kosovës, Albin Kurti më 7 mars 2022 kishte treguar synimin e Kosovës rreth aplikimit për statusin e vendit kandidat.
