Presidentja Vjosa Osmani ka pritur sot në takime të ndara përfaqësuesit e 5 shteteve që u raportua se kanë mbështetur propozimin që procesi i liberalizimit të vizave për Kosovën të lidhet me funksionalizimin e sistemit për siguri në Evropë, ETIAS.
Osmani dhe përfaqësuesit e Francës, Suedisë, Holandës, Belgjikës dhe Austrisë në Kosovë kanë biseduar për zhvillimet pas takimit të djeshëm të grupit teknik punues për vizat të Këshillit Evropian, lidhur me liberalizimin e vizave për Kosovën.
Presidentja, në takimet me ambasadorët e shteteve të BE-së, ka rikujtuar se ditë më parë Komisioni Evropian ka konfirmuar në Raportin për Kosovën se mbështet rekomandimin e bërë për heqjen e vizave për Kosovën dhe konstatimin se Kosova i ka përmbushur të gjitha kriteret.
E para e vendit ka theksuar nevojën që vendimmarrja politike lidhur me liberalizimin e vizave brenda BE-së të përmbyllet brenda kryesimit çek të BE-së, duke ditur se nuk ka qëndrime kundërshtuese nga asnjë prej shteteve anëtare të BE-së për këtë temë.
Osmani shprehu besimin që kërkesat teknike të ngritura nga disa prej shteteve anëtare të BE-së lidhur me ETIAS, sistemin evropian për autorizim dhe informacione rreth udhëtimit, të mos ndikojnë në vendimmarrjen politike dhe caktimin e ditës së hyrjes në fuqi të vendimit për liberalizimin e vizave për qytetarët e Kosovës duke prezantuar argumentet se një situatë e kundërt do t`i vendoste qytetarët e Kosovës më pozitë diskriminuese, përcjell Klan Kosova.
Ajo ka deklaruar se Kosova do të përfshihet në ETIAS, sikurse të gjitha shtetet e tjera, në momentin që ai sistem të bëhet operacional, por pa ndikuar në caktimin e ditës së hyrjes në fuqi të vendimit për liberalizimin e vizave.
