Presidenti turk Rexhep Tajip Erdogan urdhëroi Ministrinë e Energjisë që të fillojë ndërtimin e një qendre gazi në Turqi pas bisedimeve me presidentin rus Vladimir Putin.
Erdogan shtoi se të 2 vendet do të fillojnë menjëherë të punojnë për propozimin e Putinit për transportimin e gazit rus në Evropë dhe se nuk do të ketë pritje.
Putin deklaroi të enjten në takimin me Erdoganin se Turqia është rruga më e besueshme për dërgimin e gazit në Bashkimin Evropian dhe propozoi ndërtimin e një qendre gazi në atë vend.
“Gjatë funksionimit të qendrës, të cilën ne mund ta ndërtonim së bashku, sigurisht që do të ishte një platformë jo vetëm për tregtimin e gazit, por edhe për përcaktimin e çmimit, që është një çështje shumë e rëndësishme”, u shpreh Putin, raporton Reuters
Më herët të mërkurën, Putin la të kuptohet se Rusia mund të ndërtojë një qendër të madhe gazi në Turqi duke devijuar furnizimet e destinuara për tubacionin Nord Stream nën Detin Baltik, i cili u dëmtua nga shpërthimet muajin e kaluar, shkruan Euronews.al.
Autoritetet suedeze dhe daneze janë duke i hetuar shpërthimet si akte sabotimi.
