NATO ka sjellë trupa rezervë për stërvitje për misionin e saj paqeruajtës të KFOR-it në Kosovë, ka deklaruar një nga komandantët e misionit, përderisa afrohet 31 tetori, kur kalon afati për konvertimin e targave serbe në ato kosovare.
Komandanti rajonal i KFOR-it në lindje, koloneli Christopher Samulski, u tha gazetarëve se trupat rezervë ishin sjellë “si pjesë e planifikimit normal të emergjencës”.
Samulski foli në kampin Bondsteel, një nga bazat e KFOR-it në Kosovë.
Oficeri amerikan nuk dha ndonjë shifër konkrete se sa trupa rezervë kanë mbërritur në Kosovë, por foli për një njësi “me madhësi batalioni”.
Një batalion zakonisht përbëhet nga 500 deri në 1,000 trupa.
Protestat e serbëve të Kosovës gjatë verës mbi një kërkesë që ata të përdorin targat e makinave të lëshuara nga shteti kanë rritur fërkimin midis Kosovës dhe Serbisë, më shumë se dy dekada pasi NATO bombardoi Serbinë për t’i dhënë fund represionit të shumicës shqiptare të Kosovës.
Serbia nuk e njeh pavarësinë e Kosovës, të shpallur në vitin 2008, dhe serbët në veri të Kosovës e konsiderojnë Beogradin, jo Prishtinën, si kryeqytetin e tyre.
Blloqet e rrugëve të ngritura gjatë protestave të verës u zmbrapsën vetëm kur paqeruajtësit e NATO-s ndërhynë për të mbikëqyrur procesin dhe Kosova ra dakord të shtyjë vendosjen e reciprocitetit, me një afat që tani përfundon më 31 tetor, ka raportuar The Reuters.
Të martën, zëvendëskomandanti i KFOR-it tha se NATO nuk mund të përjashtojë tensione të reja në veri me afrimin e afatit, duke shtuar se NATO është gati të sjellë më shumë trupa në Kosovë nëse tensionet mes pakicave serbe ndizen sërish.
Samulski theksoi se trupat rezervë janë sjellë për stërvitje.
