Drejtori i Emergjencave në Gjakovë, Haxhi Sejdiu, ka thënë se 14 persona janë evakuuar, si pasojë e reshjeve të dendura që shkaktuan përmbytje në disa lagje.
“Zonat më të përmbytura janë në lagjen Brekoc, rruga “Shote Galica”, aty disa shtëpi janë përmbytur në ujë. Ekipet e zjarrfikësve kanë bërë evakuimin e 14 personave, të cilët i kanë bartë me barka dhe i kanë tërheq nga aty, do të thotë është bërë shpëtimi i jetëve në rend të parë, pastaj është duke u intervenuar edhe në qytet, në pjesët tjera ku ka përmbytje në bodrumet e shtëpive dhe në katet përdhesë, pra kemi pasur mjaft përmbytje”, ka thënë Sejdiu.
Drejtori i Emergjencave tregoi se kanë kërkuar ndihmë edhe nga Emergjenca Civile në Prishtinë, me këta të fundit që iu janë përgjigjur, tha ai për Klan Kosova.
“Kemi kërkuar ndihmë edhe nga emergjenca civile në Prishtinë, na kanë ardhur në ndihmë me 2 ekipe, me pompa të kapacitetit të lartë, për vërshime urbane”, tha Sejdiu.
