Deputeti i PDK-së, Rashit Qalaj, gjatë seancës në Kuvendin e Kosovës, të enjten i bëri kërkesë ministres së Arsimit Arbërie Nagavci, që të deklarohet si eksponentët e afërt të saj se mësimdhënësit e Kosovës janë analfabetë, raporton InLajmi.
Qalaj e parashtroi një pyetje për Nagavcin duke i thënë se cilat do të jenë masat që do ti ndërmarrë ndaj universiteteve publike duke e ditur se shumica e mësimdhënësve janë të diplomuar aty.
“Ministre deklarohu të lutem para deputetëve dhe qytetarëve: a pajtoheni se mësimdhënësit tanë janë analfabetë, ashtu siç kanë deklaruar eksponentët e afërt me ju apo qeverinë dhe ndonjë bashkëpartiak i juaji e deputet. Nëse mësimdhënësit janë analfabetë siç po thonë eksponentët e afërt me ju, atëherë cilat janë masat që do ti ndërmerrni ndaj universiteteve publike, sidomos ndaj UP-së, duke e ditur se gati 100% e këtyre mësimdhënësve kanë diplomuar aty”, tha Qalaj.
Kundrejt kërkesave të Çalajt është përgjigjur ministrja e Arsmit Arbërie Nagavaci e cila tha se ka përfunduar koha kur ju mund të flasni çfarë të dojë, duke i bindur të tjerët për të pavërtetat.
“I nderuar deputet ka përfunduar koha kur ju mund të flisni çfarë të keni dëshirë, në mënyrë që të mendoni se i bindni të tjerët për të pavërtetat. Nëse ke ndonjë dyshim adresoje, njëjtë qysh i kam adresuar unë dyshimet për keqpërdorime. Para se të jem ministre, unë kam qenë mësimdhënësve, kam punuar më shumë se 20 vite si mësimdhënësve, jam vajzë e 2 mësimdhënësve. Kam pasur fatin e mirë që gjithë jetën time të jem e rrethuar me mësimdhënës të mirë që kanë ndikuar në formësimin tim”, tha Nagavci. /InLajmi/
