Sindikata e Bashkuar e Arsimit, Shkencës dhe Kulturës është duke e përcjell me vazhdimësi rrjedhën e grevës nga institucionet arsimore, përcjell InLajmi.
Në komunikatën nga SBASHK-u thuhet se presionet janë të vazhdueshme edhe nëpër disa komuna, shkolla dhe qerdhe, por edhe nga prindërit me tendencën e thyerjes së moralit të grevistëve për të vazhduar me kërkesat.
Sindikata e Bashkuar e Arsimit, Shkencës dhe Kulturës u bën thirrje prindërve që të mos bëjnë presion dhe të heqin dorë nga thyerja e grevës, e këtë presion ta drejtojnë kah qeveria.
Tutje, SBASHK bëri thirrje tek organet e rendit që t’i përcjellin me vëmendje rastet siç ishte sulmi ndaj kryetarit, Rrahman Jasharaj.
Njoftimi i plotë nga Sindikata e Bashkuar e Arsimit, Shkencës dhe Kulturës e Kosovës:
Këshilli Qendror Grevist i SBASHK-ut, po përcjell në vazhdimësi tani e 13 ditë rrjedhën e grevës në institucionet arsimore ku ka vërejtur se ditët e fundit ka presione të vazhdueshme ndaj kryetarit të SBASHK-ut Jasharaj, duke u munduar ta shantazhojnë e etiketojnë me postime të rrejshme, pastaj përgatitja e tentim sulmit fizik gjatë vizitës së tij që u bëri grevistëve.
Presionet janë të vazhdueshme edhe nëpër disa komuna, shkolla dhe çerdhe, si nga ana e Qeverisë rasti i djeshëm i vizitës së Kryeministrit Kurti në Podujevë, ashtu edhe nga një numër i vogël i prindërve me fëmijët e tyre (nxënësit) që tentojnë ta thyejnë grevën.
Ju bëjmë apel prindërve që edhe përkundër që numri është i vogël që tentuan me nxënës ta thyejnë grevën me presion ndaj grevistëve, që të heqin dorë nga kjo metodë, sepse në këtë formë në asnjë mënyrë greva nuk mund të ndërpritet. Presionin ta orientojnë drejt Qeverisë duke kërkuar zgjidhje për të filluar punën institucionet arsimore.
Këshilli Qendror Grevist i SBASHK-ut është duke i përcjell me vëmendje dezinformatat nga kushdo qoftë, të cilat kanë qëllimin e vetëm përçarjen e anëtarësisë sonë. Të gjitha këto do ti paraqesim pranë organeve të drejtësisë.
Apelojmë te organet e rendit dhe organet tjera që me vëmendje ti përcjellin rastet si ai i djeshmi ndaj kryetarit Jasharaj dhe tentuesit e prishjes se rendit ti vejmë para organeve të drejtësisë, po ashtu edhe nxitësit të cilët me dezinformata të ndryshme nxisin këto sulme.
Këshilli Qendror Grevist i SBASHK-ut. /InLajmi/
