Shumë europianë janë të shqetësuar se inflacioni i lartë për shkak të krizës aktuale të energjisë mund të nxisë trazira sociale, protesta dhe greva.
Gjetjet kanë ardhur pas një sondazhi të kryer në Francë, Gjermani, Poloni dhe në Britani të Madhe.
I kryer nga anketuesi YouGov për organizatën jofitimprurëse More in Common, sondazhi tregoi se kostoja e jetesës është bërë çështja më e rëndësishme për europianët në katër vendet e anketuara.
Shumica e njerëzve të anketuar në të 4 vendet thanë se ishin të shqetësuar për trazirat sociale në muajt e ardhshëm. Në Francë, 4 në 10 persona thanë se donin të shihnin një rikthim të lëvizjes protestuese të Jelekëve të Verdhë.
Europianët janë duke e ndjerë krizën e energjisë. Një në 5 persona thanë se kanë filluar të shpenzojnë edhe kursimet, ndërsa një në 10 thanë se kanë filluar të hanë një vakt më pak.
Shumica e të anketuarve në Poloni dhe Gjermani thanë se po bënin blerje për oferta më të mira për sendet ushqimore, ndërsa shumica e të anketuarve thanë se prisnin të reduktonin ngrohjen këtë dimër për shkak të çmimeve të larta të energjisë.
Sondazhi gjithashtu gjeti se qytetarët e katër vendeve të anketuara e kanë humbur besimin te qeveritë e tyre, duke u dhënë kështu hapësirë fituese partive populiste, përcjell arbresh.info.
Pesimizmi duket se është i përhapur, pasi pak europianë presin që kriza e kostos së jetesës të përfundojë shpejt.
