Kryetari i Partisë Demokratike të Kosovës, Memli Krasniqi, është duke marrë pjesë në protestën pas dhunimit të 11 vjeçares nga 5 persona në Prishtinë, përcjell InLajmi.
Krasniqi ka kërkuar nga shteti që të reagojë në të gjitha instancat që të krijojë sigurinë dhe drejtësinë për vajzat dhe gratë.
Gjithashtu ai tha se duhet të dërgohet një mesazh i qartë tek të gjithë dhunuesit se shteti do të mbrojë vajzat dhe gratë me forcën e palëkundur të ligjit.
Postimi i plotë i tij:
Edukim. Parandalim. Siguri. Drejtësi!
Këto ditë, të gjithë jemi të shokuar nga rasti makabër i dhunimit të vajzës 11 vjeçare në Prishtinë. Dhe, për më keq, ky nuk është një rast i izoluar i dhunës ndaj vajzave dhe grave në Kosovë.
Prandaj, shteti, urgjentisht dhe me vendosmëri, duhet që të reagoj në të gjitha instancat për të rritur ndërgjegjësimin, për të përmirësuar edukimin, krijuar sigurinë dhe garantuar drejtësinë për vajzat dhe gratë.
Të veprohet sot, që të dërgohet mesazh i qartë tek të gjithë dhunuesit, se shteti, por edhe shoqëria, do të mbrojë vajzat dhe gratë me forcën e palëkundur të ligjit. /InLajmi/
