Drejtori i Zyrës për Kosovë, Petar Petkoviq, ka thënë të hënën se pranimi i dokumenteve të identitetit të Prishtinës nuk do të thotë njohje e pavarësisë së Kosovës, kjo nuk vjen në shprehje, transmeton InLajmi.
“Qëllimi i vërtetë ishte vendosja e një regjimi të vizave 90 ditore për serbët që jetojnë në Kosovë. E ruajtëm që serbët të mos jenë të huaj në tokën e tyre”, tha Petkoviq.
Ai ka vlerësuar se historia për dokumentin e hyrje-daljeve është arsyeja që kryeministri i Kosovës Albin Kurti të arrijë një zgjidhje përfundimtare ndërmjet Prishtinës dhe serbëve në veri të Kosovës.
“Ne arritëm ta shtyjmë krizën për një kohë të caktuar, që në fillim të shtatorit të mos ketë trazira, fëmijët të mund të shkojnë në shkollë të qetë. Problem ende janë targat”, tha Petkoviq pë TV Pink.
Ndryshe, të shtunën shefi i diplomacisë evropiane, Josep Borej njoftoi për arritjen e marrëveshjes mes Kosovës dhe Serbisë për dokumentet e identifikimit, që do të thotë se Serbia ka pranuar të anulojë lëshimin e dokumenteve të hyrjes për personat që kanë dokumente identiteti të Kosovës dhe Kosova ka rënë dakord që të mos i lëshojë dokumente për hyrje dalje për ata që kanë letërnjoftime serbe. /InLajmi/
