Kryetari i Lidhjes Demokratike të Kosovës, Lumir Abdixhiku, ka reaguar në lidhur me reduktimet e energjisë elektrike në vend, duke thënë se arsyeja pse Kosova nuk ka rrymë është sepse Blloku A5 i KEK-ut, se ka kryer mirëmbajtjen e rregullt e të paraparë me kohë, përcjell InLajmi.
Abdixhiku tha se gjatë muajve në vazhdim kur çmimi i energjisë do të rritet, vlera e humbur do të jetë shumë më e lartë.
Gjithashtu kreu i LDK-së e ka ftuar Prokurorinë që të hetojë këtë vonesë në mirëmbajtjen e Bllokut A5, duke i bërë thirrje Qeverisë që të shkarkojë Bordet e KEK-ut dhe ZRRE-së.
Postimi i plotë i tij:
Kosova nuk ka rrymë sot sepse Blloku A5 i KEK-ut, që prodhon plot 13% të rrymës në Kosovë, nuk ka kryer mirëmbajtjen e rregullt e të paraparë me kohë – prandaj tash e një muaj nuk është në funksion. Një muaj as mirëmbajtje e as prodhim. Dhe do të qëndrojë kështu për shumë kohë sepse Qeveria e Kosovës, sikurse në çdo temë tjetër, është e vonuar të veprojë. Verës pushon, dimrit nisë të mirëmbajë – këso praktike të mbrapshtë nuk njeh asnjë shtet.
Të shtunën, nga 130 MËH në orë, apo 78.000 euro për orë (në pikun energjetik), i humbasim si pasojë e kësaj vonese skandaloze. Madje, gjatë muajve në vijim, kur çmimi i energjisë rritet edhe më shumë, vlera e humbur do të jetë shumë më e lartë se kjo. Kemi kapacitete por s’i kemi në punë. Kjo është e vërteta e reduktimeve të rrymës në verë.
Përtej neglizhencës së praktikantëve, nuk mund të mendojë asgjë tjetër, veçse një interes madhor që përfiton miliona euro nga tenderet riparuese e nga blerja e energjisë derisa ne nuk prodhojmë.
Prandaj ftoj Prokurorinë e Kosovës, të hetojë vonesën në mirëmbajtjen e Bllokut A5. Siç dhe ftoj Qeverinë e papërgjegjshme të Kosovës të zgjohet nga gjumi i thellë veror e të bëjë çdo përgatitje të nevojshme për një dimër të vështirë për energjinë – nisur nga shkarkimi i Bordeve partiake në KEK e ZRRE që me paaftësi po krijojnë terr në verë. /InLajmi/
