Përfaqësues të Aleancës për Ardhmërinë e Kosovës, shprehen të zhgënjyer me qasjen e qeverisjes aktuale për përzgjedhjen e ambasadorëve në 9 vende ku Kosova ka përfaqësi, e që sipas tyre përzgjedhja është bërë në kundërshtim me Kushtetutën e Kosovës, raporton InLajmi.
Këto shqetësime i ka shprehur deputetja e Kuvendit nga AAK-ja, Time Kadrijaj në një konferencë për medie të enjten, e cila tha se votimi i ambasadorëve të përzgjedhur ka qenë kundërkushtetuese, sepse në komision nuk ka pasur kuorum.
Për më tepër, deputetja Kadrijaj tha se në shumë raste të përzgjedhjes së ambasadorëve në mungesë të prezencës fizike, kryetari i këtij Komisioni, Haki Abazi, ka telefonuar deputetët për të shprehur votën e tyre.
Gjithashtu ajo ka kujtuar se procedura e përzgjedhjes përveçse që ka qenë kundërligjore e kundërkushtetuese, ka qenë në kundërshtim edhe me Rregulloren e Punës së Kuvendit.
Kadrijaj ka thënë se këto praktika ku votimi është kryer përmes telefonit janë përdorur në rastin e përzgjedhjes të të propozuarit për Konsull në New York, Blerim Reka e gjithashtu edhe gjatë votimit të kandidatit për ambasador në Kroaci, Martin Berishaj.
“Kandidati i propozuar për ambasadorë në Kroaci, Martin Berishaj është përzgjedh në këtë mënyrë, që i bie edhe vetë Berisha është jolegjitim. Kandidati i propozuar në Mbretërinë e Bashkuar, në Emiratet e Bashkuara Arabe dhe në Francë, janë propozuar në mënyrë jo të rregullt. Të gjithë këta kanë bërë shkelje kushtetuese”, tha Kadrijaj. /InLajmi/
