Ekonomisti, Besnik Avdiaj duke folur për çështjen e ngritjes së çmimeve tha se tregtarët dhe bizneset i shfrytëzojnë situatat e krizave.
Avdiaj theksoi se kur spekulohet për rritje të çmimeve, bizneset priren që ta shfrytëzojnë situatën dhe t’i rrisin çmimet, e që sipas tij, kjo vjen për shkak të përfitimeve afatshkurtra.
“Ajo që nuk po theksohet dhe nuk po diskutohet mjaftueshëm, dhe nuk po merren veprime në këtë drejtim është inflacioni spekulativ te ne, për shkak se psikologjikisht kur pritet rritja e çmimeve edhe tregtarët edhe bizneset priren që atë rritje me e shfrytëzu, me e manipulu në njëfarë forme që me e pasë përfitime afatshkurtra”, tha ai.
Tutje Avdiaj në emisionin “Këndi i Debatit” theksoi se konsumatorët në situata të krizave mundohen që të kursejnë për shkak, të paqartësive të së ardhmes.
“Është shumë normale në çdo krizë dhe në çdo vend të botës jo vetëm në Kosovë, bizneset i shfrytëzojnë situatat e krizave që të përfitojnë sa më shumë kurse, në anën tjetër konsumatorët në situata të krizave mundohen të kursejnë sa më shumë për shkak të pa parashikueshmërisë dhe paqartësive të së ardhmes”, tha ai.
