Fotoreporteri, Ridvan Slivova teksa ka folur për përvojën e tij 30-vjeçare në këtë profesion ka rrëfyer disa momente edhe nga lufta e fundit në Kosovë.
Slivova ka komentuar disa nga shkrepjet e tij gjatë kohës së luftës për të treguar tmerrin dhe keqtrajtimin që kanë pasur popullata civile nga forcat serbe.
Por, ai është ndalur te një fotografi që e kishte shkrepur në kolonën e njerëzve që po iknin nga regjimi serb në fshatin Makovc.
Ai thotë se edhe vet ishte pjesë e kësaj kolone, por që për të mos humbur dëshmitë e kësaj kohe, i kishte groposur negativat e filmave.
“Është e njëjta ditë në pjesën e Makovcit, dua të shtoj se edhe unë kam qenë pjesë e kësaj kolone. Kam qenë dëshmitar i kësaj ngjarje, kam parë edhe kufoma ka edhe pamje të rënda që nuk kam dashur me i publiku. Unë kam qenë pjesë e kolonës, kemi ardhë në Prishtinë dhe këta filma i kam shti në dhe, dhe u kam tregu të gjithë atyre pjesëmarrve ku i kam lënë që nëse më ndodh diçka së paku mos të humbin dëshmitë”, tregoi ai.
Po ashtu, Slivova rrëfen se gjatë asaj kohe si fotoreporter ishte përballur me mungesë të negativave të filmave, për çka thotë se është dashur që t’i kursejë sa më shumë ato, tha ai në Tëvë1.
“Për fat të mirë, në luftë fotoreporterin Afrim Hajrullahun e kam pasur afër shtëpisë, ka ardhur motra tij për me pa shtëpinë dhe i kam gjetur një komplet filma 10 copë që mu ka dok shumë sikur 100 copë… Këtu është qëllimi që është dashur të ruhet negativin se nuk kishim mjaftueshëm ishim në një zonë të izoluar lufte”, shtoi ndër tjerash ai.
