Forcat ruse kanë intensifikuar granatimet e tyre në lindje të Ukrainës, me qytetin e 2-të më të madh, Harkivin, që është përballur me sulme të reja 2 ditë pas sulmit në ndërtesën e banimit, që ka lënë të vdekur të paktën 24 persona në një qytet të vogël në rajonin e Donjeckut.
Sulmet më 11 korrik vijnë teksa forcat ruse po shtyjnë përpara ofensivën e tyre për të marrë nën kontroll të plotë rajonin e Donjeckut, që së bashku me rajonin fqinj, Luhansk, përbëjnë Donbasin.
Në Harkiv, që gjendet në verilindje të Ukrainës, por jashtë Donbasit, guvernatori rajonal, Oleh Synyehubov, tha se një ndërtesë banimi dhe një shkollë janë sulmuar me raketa, duke lënë të vdekur tre persona dhe plagosur 28 të tjerë.
“Të gjitha sulmet ekskluzivisht janë ndaj objekteve civile. Ky është terrorizëm absolut”, tha Synyehubov.
Rusia tha se sulmet kishin për cak personelin e ushtrisë ukrainase dhe “mercenarët e huaj”, duke shtuar se forcat ukrainase po pësojnë humbje të mëdha në luftime.
Në qytetin Çasiv Jar të Donjeckut, ekipet e shpëtimit kontrolluan rrënojat pas rrëzimit të një ndërtese pesëkatëshe banimi, e cila u godit nga raketat ruse më 9 korrik.
“Deri në mëngjesin e 11 korrikut, 18 persona kanë vdekur, gjashtë janë shpëtuar nga rrënojat, dhe rreth 137 tonë rrënoja janë pastruar”, thanë ekipet e emergjencave. Më vonë, autoritetet bën të ditur se numri i viktimave është rritur në 24.
Zyrtarët ukrainas druajnë se edhe dhjetëra persona mund të jenë të bllokuar nën rrënoja.
Më herët, guvernatori i Donjeckut, Pavlo Kyrylenko, tha se të paktën 30 persona “janë nën rrënojat” e ndërtesës, që u goditur me raketa ruse Uragan, përcjell REL.
Presidenti ukrainas, Volodymyr Zelensky, tha se sulmi në Çasiv Jar paraqet edhe një krim tjetër të mundshëm lufte, të kryer nga forcat pushtuese ruse.
