Mijëra civilë, duke përfshirë gra, të moshuar dhe fëmijë janë bllokuar në Severodonetsk me një furnizim të zvogëluar të ujit të pastër, kanalizimeve dhe energjisë elektrike, sipas OKB-së, transmeton InLajmi.
OKB tha se një situatë urgjente po zhvillohej në bunkerët nën fabrikën kimike Azot në qytetin kyç të Ukrainës lindore, ku qindra civilë po strehohen nga luftimet intensive.
Saviano Abreu, një zëdhënës i zyrës së OKB-së për Çështjet Humanitare, tha se mungesa e ujit dhe kanalizimeve ishte shumë shqetësuese.
Është një shqetësim i madh për ne, sepse njerëzit nuk mund të mbijetojnë për një kohë të gjatë pa ujë,” tha ai.
“Nëse ata duhet të mbështeten në burime të pasigurta, kjo sjell komplikime me shëndetin. Ne duhet të sigurohemi që, sa më shpejt të jetë e mundur, njerëzit që janë ende atje të kenë akses në ujë.”
Dega humanitare e OKB-së po përgatitet për të ofruar ndihmë për ata që janë bllokuar në qytet, por aktualisht nuk ka akses apo garanci për të arritur te civilët në mënyrë të sigurt, shkruan CNN.
Rusia premtoi të hapte një korridor humanitar për evakuimin e civilëve nga zona sot, por, deri më tani, nuk ka pasur asnjë konfirmim se kjo ka shkuar përpara. /InLajmi/
