Deputetja e PDK-së, Ariana Musliu-Shoshi, në një konferencë për media ka denoncuar keqpërdorimin e 1 milionë e 40 mijë eurove, ku të përfshirë janë 2 Ministrat e Qeverisë Kurti, Donika Gërvalla dhe Fikrim Damka, raporton InLajmi.
Musliu-Shoshi ka thënë se Gërvalla ka hapur rrugë nënshkrimit të kundërligjshëm të saj, duke inkurajuar dhe lejuar keqpërdorimin e rreth 1 milion e 40 mijë eurove.
“Fjala është për një “Memorandum Bashkëpunimi”, në mes të Ministrisë së Zhvillimit Rajonal dhe Caritas-it Zviceran, në bazë të të cilës, buxheti i Republikës së Kosovës shpenzohet kundërligjshëm në shumë prej 1 milion e 40 mijë euro. Kjo marrëveshje, është nënshkruar dhe tashmë është duke u realizuar por një gjë e tillë ka ndodhur vetëm pas Pëlqimit zyrtar të cilin e ka nënshkruar Zëvendëskryeministrja dhe Ministrja e Punëve të Jashtme dhe Diasporës, Donika Gërvalla – Schwarz, e cila i ka hapur rrugë nënshkrimit të kundërligjshëm të saj, duke inkurajuar dhe lejuar kështu keqpërdorimin e rreth 1 milion e 40 mijë eurove.”, ka thënë deputetja Musliu-Shoshi.
Gjithashtu ajo tha se marrëveshje të tilla mund të lidhin ministritë vetëm me shtetet e huaja ose organizatat ndërkombëtare dhe vetëm nëse marrëveshjet e tilla nuk përmbajnë obligime të detyrueshme për Qeverinë.
“Por pikërisht mbi këtë bazë, Donika Gërvalla – Schwarz, Zëvendëskryeministre dhe Ministre e Punëve të Jashtme dhe Diasporës, më datë 06 gusht 2021, i ka nënshkruar letrën përmes së cilës ministrit Damka i’u ka dhënë pëlqimi për nënshkrimin e këtij Memorandumi të Bashkëpunimit. Pra, ky Memorandum është nënshkruar në kundërshtim të plotë me ligjin, për 2 arsye kryesore: Së pari, është nënshkruar me një OJQ që nuk është subjekt i marrëdhënieve ndërkombëtare. Së 2-ti, e njëjta përmban obligime financiare mbi 1 milion euro për qeverinë nga buxheti i taksapaguesve të Kosovës.”, ka thënë deputetja Ariana Musliu-Shoshi.
Më tej ajo ka shtuar se ky memorandum është nënshkruar për 2 arsye është nënshkruar me një OJQ që nuk është subjekt i marrëdhënieve ndërkombëtare dhe se njëjta përmban obligime financiare mbi 1 milion euro për qeverinë nga buxheti i taksapaguesve të Kosovës. /InLajmi/
