Kryeministri i Kosovës, Albin Kurti ka thënë se Qeveria e Kosovës pret angazhim më të madh në ndjekjen dhe gjykimin e krimeve të luftës, pasi sipas tij janë bërë 3 vite mungesë që nga ndjekja e krimeve të luftës, e këtë angazhim Kurti tha se ia kemi borxh familjeve të të vrarëve, të cilët presin drejtësi, përcjell InLajmi.
Kurti theksoi se Kodi i Procedurës Penale i Republikës së Kosovës mundëson gjykimin në mungesë, që domethënë se të akuzuarit mund edhe të mos jenë të pranishëm gjatë procesit gjyqësor.
Tutje kryeministri shtoi përkushtimin e Qeverisë për këtë çështje, duke thënë se brenda vitit të parë të qeverisjes së tyre është shtuar buxheti për rritjen e numrit të prokurorëve special dhe bashkëpunëtorëve profesionalë për këtë çështje. Gjithashtu ai tha se do të krijohet edhe Instituti, që do të dokumentojë krimet e kryera gjatë luftës.
“Krimet e luftës nuk parashkruhen, por ditët e vitet ikin shpejt. Me këto ikin edhe ata të cilëve shteti u ka borxh vënien e drejtësisë për familjarë të vrarë e për dhimbjen e papërballueshme e cila po mbetet pa përgjigje”, shkruan ai.
Kurti tha se kriminelët duhet dënuar, mirëpo për këtë theksoi rëndësinë e përgjegjësinë e lartë institucionale, në radhë të parë të Prokurorisë Speciale për dokumentimin e këtyre krimeve.
Postimi i plotë i tij:
3 vite mungesë në ndjekjen e krimeve të luftës.
Kodi i Procedurës Penale i Republikës së Kosovës mundëson gjykimin në mungesë. Para tri vitesh, kërkesa e pashtershme për drejtësi për viktimat, ka sjellë deri te miratimi i një norme të këtillë juridike që mundëson mbarëvajtje të procesit gjyqësor pa praninë e të akuzuarit.
Qeveria pret angazhim me të madh në ndjekjen e gjykimin e krimeve të luftës. Për këtë, brenda vitit të parë kemi shtuar buxhetin për rritjen e numrit të prokurorëve special dhe bashkëpunëtorëve profesionalë. Po ashtu, po punojmë në krijimin e Institutit që do dokumentojë krimet e kryera gjatë luftës, e po punojmë zellshëm në hartimin e strategjisë per drejtësinë tranzicionale.
Krimet e luftës nuk parashkruhen, por ditët e vitet ikin shpejtë. Me këto ikin edhe ata të cilëve shteti u ka borxh vënien e drejtësisë për familjarë të vrarë e për dhimbjen e papërballueshme e cila po mbetet pa përgjigje.
Kriminelët e luftës duhet dënuar dhe për këtë është e nevojshme dhe e domosdoshme përgjegjësia më e lartë institucionale, në radhë të parë e Prokurorisë Speciale e pastaj e tërë sistemit.
Pesha e përgjegjësisë e organeve të drejtësisë tejkalon atë profesionale dhe imponon veprim efikas. Këtë e kemi borxh. /InLajmi/
