Imazhet e reja satelitore tregojnë se një anije mallrash ruse plot me drithëra e dyshuar si e vjedhur nga fermat ukrainase ka mbërritur në portin sirian të Latakisë, transmeton InLajmi.
Imazhet e reja, të siguruara nga Maxar Technologies tregojnë transportuesin me shumicë “Matros Pozynich” në Latakia më 27 maj.
Është një nga 3 anijet që rusët kanë ngarkuar grurë në portin e Krimesë të Sevastopolit që nga pushtimi rus i Ukrainës.
Është vlerësuar se anija mund të transportojë rreth 30 mijë tonë drithë.
Autoritetet ukrainase vlerësuan në fillim të këtij muaji se forcat ruse në zonat e pushtuara kishin kapur më shumë se 400 mijë tonë drithë.
Vjedhjet e drithit po kërcënojnë të korrat e këtij viti në Ukrainë, e cila është një nga vendet më të rëndësishme prodhuese të drithit në botë, shkruan CNN.
Për Rusinë, gruri është një mall tërheqës. Çmimi i grurit është rreth 400 dollarë për ton në tregjet botërore dhe është rritur ndjeshëm këtë vit. /InLajmi/
