Deputetja e PDK-së, Ganimete Musliu ka thënë se Agjencia e Kosovës për Inteligjencë nuk është treguar aspak e zgjuar në lidhur me lëshimin e komunikatës për inspektorin Burim Ramadani, të cilit i është bërë ftesë nga Gjykata Speciale, përcjell InLajmi.
Sipas Musliut, AKI-ja nuk duhej të përfshihej, pasi kjo ftesë Ramadanit i është bërë për kohën e tij të adoleshencës dhe jo për punën e tij si Inspektor i Përgjithshëm i AKI-së.
Musliu tha se ky institucion e ka punë të përditshme fshehtësinë dhe sipas saj AKI nuk duhej të lëshonte një komunikatë zyrtare lidhur me ftesën e Ramadanit.
Deputetja ka thënë se do të kërkojë përgjegjësi për këtë “rrëshqitje të AKI-së” në këtë rast, për faktin se siç thotë ajo, ky institucion nuk do duhej të lëshonte fare komunikatë në lidhje me rastin,
Ajo theksoi se AKI-ja nuk është në shërbim të individëve, por në shërbim të shtetit dhe sigurisë së qytetarëve tanë.
Postimi i plotë i saj:
Agjencia e Kosovës për Inteligjencë nuk u tregua aspak inteligjente lidhur me ftesën e Gjykatës Speciale që i ka ardhur Burim Ramadanit për kohën e tij të adoleshencës dhe jo për punën e tij si Inspektor i Përgjithshëm i AKI-së.
Ky institucion që fshehtësinë e ka punë të përditshme, çuditërisht lëshoi edhe komunikatë zyrtare lidhur me një ftesë për Ramadanin, rast që siç njoftoi nuk ndërlidhet asgjë me institucionin.
Shfrytëzimi i AKI-së nga Ramadani për të tërhequr vëmendje publike në emër të saj e dëmton më së shumti vetë këtë institucion, ku me përkushtim dhe integritet të lartë shërbejnë shumë vajza dhe djem që e duan Kosovën pa politikë, pa hile dhe pa rezerva.
Si Kryetare e Komisionit për Mbikëqyrjen e AKI-së do të kërkoj zyrtarisht përgjegjësi për rrëshqitjen e këtij institucioni në këtë rast, ku nga Ramadani thjesht është kërkuar “të ofrojë detaje në lidhje me lokacionin e tij fizik dhe gjeografik gjatë kohës se luftës dhe të ofrojë dokumentacion përfshirë këtu edhe fotografi dhe të dhëna tjera nga periudha nga 1 janar 1998 deri 31 dhjetor 2000”.
AKI-ja nuk është në shërbim të individëve, por në shërbim të shtetit dhe sigurisë së qytetarëve tanë. /InLajmi/
