Kreu i AAK-së, Ramush Haradinaj ka kujtuar generalin Ilir Konushevcin dhe doktorin Hazir Malën në përvjetorin e rënies së tyre, përcjell InLajmi.
Haradinaj theksoi se në ditën e rënies së tyre, në Llapushnik po zhvillohej në betejë që i dha kahje të re luftës sonë për liri, duke shtuar se 24 vjet më parë trimat e UÇK-së i ndërpren armikut një prej arterieve kryesore të furnizimit dhe logjistikës.
Sipas Haradinaj, populli shqiptar edhe pse i ndarë, gjatë luftës së UÇK-së veproi si një trup.
Tutje kreu i AAK-së tha se me përulje e respekti kujtojmë e i nderojmë të rënët gjatë kësaj beteje, lavdia e së cilës do të mbijetojë shekujt.
Postimi i plotë i tij:
Populli shqiptar, edhe pse i ndarë, gjatë Luftës Çlirimtare veproi si një trup. Duke kujtuar sot figurat emblematike të lirisë sonë, Gjeneral Major Ilir Konushevci e Doktor Hazir Mala, kujtojmë përpjekjen e shqiptarëve të bashkuar me shpirt e pushkë, për ta fituar lirinë dhe për ta mbrojtur atë përjetë.
Në ditën e rënies së tyre, në Llapushnik po zhvillohej një betejë e cila i dha kahje të re luftës tonë për liri. Njëzetekatër vjet më parë, trimat e Ushtrisë Çlirimtare të Kosovës i ndërpren armikut një prej arterieve kryesore të furnizimit dhe logjistikës. Me përulje e respekt kujtojmë e nderojmë të gjithë të rënët gjatë kësaj beteje, lavdia e së cilës do të mbijetojë shekujt. /InLajmi/
