Shefi i Grupit Parlamentar të Partisë Demokratike të Kosovës, Abelard Tahiri, ka prezantuar në detaje shifrat e prodhimit, eksportit dhe importit të energjisë elektrike për plotë 4 muajt e fundit, raporton InLajmi.
Sipas tij për muajt shkurt, mars dhe prill edhe pse kërkesën për konsum Kosova e ka plotësuar përsëri qytetarët kanë paguar faturat më çmime të rritura, ndërsa mendja i ka ngelur tek 100 milionshi i subvencionimit të tarifave.
“Gjatë këtyre 3 muajve (Shkurt, Mars, Prill) ne i kemi paguar dyfishin e çmimit të energjisë elektrike të prodhuar nga KEK-u me çmimin e njëjtë, KEK-u nuk e ka shtrenjtu çmimin e megavatit në anën tjetër neve na u janë dyfishu fakturat dhe i kemi nda plus 100 milionë euro për subvencionim të faturave. Ne e dijmë që 25 milionë eurot e para janë shpenzu një pjesë nga KEK dhe KESCO, por më nuk dijmë se si janë shpenzu 100 milionë euro për subvencionimin e tarifave të qytetarëve. Për 3 muaj, prodhimi në vendin tonë e ka mbulu kërkesën për konsum kur ne i kemi pagu faturat në rritje”, tha Tahiri.
Tahiri ka kërkuar nga Qeveria e Kosovës të jap shpjegim ku kanë shkuar 100 milionë euro subvencionim , të cilat u prezantuan për prodhim, eksport dhe import të rrymës.
“Këta numra flasin shumë, këta numra dojnë shpjegim të prodhimit, eksportit dhe importit e dojnë një shpjegim. Të panjohurat tona janë, pse duhet me u dyfishi çmimi i energjisë elektrike, e që KEK nuk e ka shtrenjtu vazhdon me shitë të njëjtin dhe pse duhet me u subvencionu tarifat me 100 milionë euro shtesë para të qytetarëve kur poashtu nuk ka nevojë për import, pra ky është një projeksion që ka dalë nga institucionet tona dhe janë të dhëna zyrtare”, tha ai.
Ndryshe Tahiri bashkë më PDK-në i kanë bërë thirrje kryeministrit Kurti që t’i lejojë deputetët e VV-së ta votojnë themelimin e Komisionit Hetimor Parlamentar, sepse faktet janë të mjaftueshme që një deputet të bindet e ta votoi Komisionin Hetimor.
“Këto fakte janë të mjaftueshme për një deputet të Kuvendit që të bindet se duhet një Komision Hetimor Parlamentar. Ne i bëjmë thirrje kryeministrit Kurti që mos t’i bllokojë deputetët e tij ta votojnë themelimin e Komisionit Hetimor”, tha ai. /InLajmi/
