Një grua 28 vjeçare në Bosnje e Hercegovinë ka mbetur e vdekur nga plagët e shkaktuara nga tërmeti, pasi një gur i madh ra mbi shtëpinë e saj. Prindërit e saj po ashtu mbetën të lënduar, sipas raportimeve nga mediat lokale.
Nga Spitali Kantonal, doktor Safet Mujiq ka konfirmuar për portalin “Avaza” se vajza E.S e sjellë nga Stolaci në gjendje të rëndë ka ndërruar jetë, pavarësisht përpjekjeve për ta shpëtuar.
Sipas Qendrës Sizmologjike Evropiane-Mesdhetare, epiqendra e tërmetit ishte 20 kilometra në lindje të Stolacit dhe 45 kilometra në juglindje të Mostarit.
Qendra Shëndetësore në Stolac ka konfirmuar për Radion Evropa e Lirë se një grua është lënduar rëndë në këtë qytet. Siç u tha, bëhet fjalë për një grua të lindur në vitin 1992.
Ajo u gjet nën rrënoja, pasi një pjesë e një kodre u shemb mbi shtëpinë e familjes së saj. E lënduara është transferuar me urgjencë në Qendrën Klinike të Mostarit, 40 kilometra larg Stolacit, transmeton Klan Kosova.
Nga Qendra Shëndetësore e Stolacit thanë se ka më shumë të lënduar, por ende nuk e kanë numrin e saktë.
