Koncerti festiv i Ansamblit kombëtar të këngëve dhe valleve popullore nga Shqipëria, me 25 prill, nis rrugëtimin nga Prizreni nëpër kosovë, – shkruan InLajmi.
Shënimi i Ditës së Tokës, me 22 prill, Ditës botërore të Librit, me 23 prill, prezantimi i rregullores për Festivalin “Hasi jehon”, si aset kombëtar, ndihma në përfundimin e procedurave juridike e ligjore për privatizimin e KF “Liria”, punimet rreth sistemin e ngrohjes-ftohjes dhe të ventilimit në palestrën sportive “Sezai Suroi”, janë vetëm disa nga aktivitetet e shumta të Drejtorisë komunale për Kulturë Rini dhe Sport në Prizren për muajin prill. 
“E veçanta e Prizrenit, që njihet si kryeqytet shpirtëror e kulturor i të gjitha trojeve tona, na obligon që të punojmë me një elan të pashuar, jo vetëm në ruajtjen e traditave kulturore e sportive, por edhe në kultivimin dhe prezantimin e denjë të këtyre traditave, – tha për Inlajmin, Adem Morina, drejtor në DKRS. “Ne gjithëherë do të jemi në mbështetje të vlerave të shumta tradicionale si kulturore ashtu edhe sportive në qytetin e lashtë të Prizrenit. Është privilegj, por edhe obligimi ynë, që në mënyrë të denjë ta arësyetojmë votën dhe djersën e taksapagauesve tanë, ngase për gjitha këto aktivitete e kemi edhe përkrahjen e pa rezervë të kryetarit të komunls Shaqir Totaj.
Të shtojmë se nën patronatin e kryetarit Shaqir Totaj me 25 prill, qytetarët prizrenas, do të mund të përcjellin, koncertin festiv të Ansamblit kombëtar të këngëve dhe valleve popullore nga Shqipëria. /InLajmi/ Osman Goranci
