Driton Selmanaj i Lidhjes Demokratike të Kosovës, ka thënë sot se Kosova asnjëherë nuk ka pasur opozitë më të moderuar sesa kjo e kësaj legjislature.
Ai ka thënë se janë duke e lënë Qeverinë që të punojë dhe nuk po e pengojnë.
Ne po i lëmë me punu. Nuk jemi duke i pengu. Opozitë më të moderuar nuk besoj që ka pasur Kosova në 20 vitet e fundit”, tha ai.
Selmanaj është përgjigjur edhe rreth komenteve që e kanë cilësuar opozitën e kësaj legjislature të dobët.
“Cilësime të tilla ndoshta edhe nuk janë tërësisht të padrejta. Mund të kemi elemente edhe ku pajtohemi, por ma të moderuar nuk ka pasur asnjëherë. Po i shfrytëzojmë instrumente e kontrollit parlamentar. Asnjëherë fjalor fyes, demonstrues, asnjëherë mjete të dhunës, sulm mbi kryeministrin dhe familjen e tij”, deklaroi ai.
Ai e përmendi edhe sulmin në shtëpinë e ish-kryeministrit Isa Mustafa, shkruan Gazeta Express.
“Në të kaluarën ka ndodhur që edhe shtëpitë private janë sulmuar. As nuk mendojmë me hudh gaz lotsjellës dhe me ndjek kryeministrin me gaz në fytyrë e as me gju me vezë”, tha ai.
