Presidenti i Kosovës, Hashim Thaci ka treguar se sot do të dërgoj trupa shtesë të Forcës së Sigurisë, të specializuara për sanimin e pasojave në zonat e goditura nga tërmeti në Shqipëri.
Tutje, Thaci ka shtuar se kthimi i njerëzve të ardhur në Kosovë do të bëhen në mënyrë të organizuar vetëm pas konstatimit real që shtëpitë dhe banesat e tyre janë të sigurta.
Postimi i plotë i tij:
“Gjendja ne Durrës dhe Thumanë të Shqipërisë pas tërmeteve vazhdon të jetë e rëndë. E përcolla më vëmendje mbledhjen e Qeverisë së Shqipërisë dhe konstatimin e gjendjes nga kryeministri Rama. Tani shtrohet nevoja urgjente për sanimin e pasojave që të mos rrezikohet asnjë jetë e njerëzve.
Pas bisedës telefonike me kryeministrin Rama, nga sot Kosova dërgon trupa shtesë të Forcës së Sigurisë, të specializuara për sanimin e pasojave dhe konstatimin dhe evidentimin e saktë të shkallës së dëmtimit të ndërtesave në zonat e goditura nga tërmeti.
Kthimi i njerëzve nëpër shtëpi duhet të bëhet në mënyrë të organizuar vetëm pas konstatimit real që shtëpitë dhe banesat të jenë të sigurta dhe të mos ndodhin fatkeqësi të tjera”, shkroi Thaçi./InLajmi
