Kryetari i Kuvendit të Kosovës, Glauk Konjufca, ka thënë se masakrat në fshatrat Krushë e Madhe dhe Krushë e Vogël, tregon gjenocidin e kryer në Kosovë, përcjell InLajmi.
Ai tutje ka thënë së shtëpitë në këto vende kanë mbetur pa asnjë mashkull, pikërisht kjo është që tregon gjenocidin masiv.
Konjufca është shprehur se kjo masakër që kanë përjetuar banoret e pambrojtur, do të ngelet plagë në trupin e gjithsecilit prej tyre dhe po ashtu të shtetit.
Ndërsa sipas tij derisa ky gjenocid të dënohet këto plagë do të qëndrojnë të tilla.
Postimi i plotë i tij:
Sot, në 23 vjetorin e masakrave të tmerrshme në Krushë të Madhe dhe Krushë të Vogël, me dhembje përkujtuam më shumë se 350 banorë, përfshirë edhe gra e fëmijë, të vrarë, të masakruar dhe të zhdukur me dhunë nga forcat pushtuese serbe, më 25, 26 dhe 27 mars 1999.
Masakrat në fshatrat Krushë e Madhe dhe Krushë e Vogël, ku dhjetëra familje shqiptare mbetën pa asnjë mashkull, shënojnë vrasjet masive me përmasa gjenocidi.
Plaga e parë është masakra e përjetuar nga banorët e pambrojtur, plaga e 2-të janë të zhdukurit me dhunë dhe e 3-ta mungesa e drejtësisë për viktimat dhe familjarët e tyre. Dhe jo vetëm për ta, këto vazhdojnë të jenë plagë të hapura në trupin e popullit dhe shtetit tonë, përderisa nuk ndëshkohen kryerësit e gjenocidit në Kosovë.
Lavdi e përjetshme të gjithë të rënëve për lirinë dhe pavarësinë e Republikës së Kosovës! /InLajmi/
