Pavarësisht thirrjeve dhe përpjekjeve të shteteve të QUINT-it që zgjedhjet presidenciale dhe parlamentare të Serbisë të mbaheshin në Kosovë me 3 prill, kryeministri i vendit, Albin Kurti vendosën të refuzonin një gjë të tillë, shkruan InLajmi.
Lidhur me këtë ka pasuar reagim të ashpër nga Amerika dhe 4 vendet e tjera të Evropës. Madje këtë e ka konfirmuar së fundmi në media edhe vet kryeministri Kurti.
Në një prononcim për Gazetën InLajmi, Ish-koordinatori nacional për dialogun Kosovë-Serbi, Skender Hyseni, tha se çdo sugjerim dhe rekomandim dashamirës i QUINT-it, duhet të merret shumë seriozisht.
“ Çdo sugjerim dhe rekomandim dashamirës i QUINT-it ku bëjnë pjesë vendet që e kanë përkrahur Kosovën më së shumti në të gjitha fazat e shtetndërtimit duhet të merren shumë seriozisht, të analizohen me kujdes çdo rekomandim. Po ashtu edhe përgjigjja të jetë shumëfish më e kujdesshme sepse në politikë është lehtë të japësh deklarata, por nuk është gjithmonë e lehtë të riparosh dëmet që mund të shkaktojë një deklarim i pamatur”, tha Hyseni.
Më tej, Hyseni tha se duhet pasur shumë kujdes jo vetëm politikanët nga Kosova, por edhe të tjerët nga cilido vend që është që në këtë kohë kur vëmendja e botës është në Ukrainë të kenë kujdes me deklaratat që i japin.
“Është lehtë të japësh deklarata të cilat eventualisht mund të prodhojnë pasoja të natyrave të ndryshme por gjithmonë është e vështirë të japim deklarata retorike e të forta, pa menduar mirë. Aq më tepër në kohën kur bota është e përqendruar në konfliktin e Rusisë në Ukrainë dhe Aleancës Perëndimore, hiq nuk i duhet një tensionim tjetër kudo qoftë në Evropë. Vet lufta në Ukrainë duhet ta bëjë politikanin kudo qoftë të jetë shumëfish i kujdesshëm me veprime dhe me deklarata”, tha Hyseni
Ndryshe, kur jemi tek kritika e QUINT-it dhe zgjedhjet serbe , kryeministri Albin Kurti sot ia ka nisur një letër Bashkimit Evropian, duke u thënë atyre por edhe OSBE-së që të mos legjitimojnë orvatjet e Serbisë./InLajmi/
