Janë bërë 3 vite që kur nuk janë aktivizuar rezervistët e Forcës së Sigurisë së Kosovës.
Nga situata krijuar në Ukrainë dhe sulmi që Rusia i bëri një shteti sovranë paraqet rrezik edhe për Kosovën nga ana e Serbisë.
Njohjes të çështjeve për siguri në Kosovë thonë se ushtrimet duhet të zhvillohen dhe ushtarët tanë duhet të jenë të përgatitur ndaj çdo kërcënimi të mundshëm.
Kryetari i Komisionit për Çështjet e Sigurisë dhe Mbrojtjes, Bekë Berisha për arbresh.info tha se janë bërë 3 vite që kur rezervistët nuk janë aktivizuar.
Berisha tutje tha se ka kontaktuar me disa nga ta dhe ka dëgjuar ankesat e tyre.
“Ata për çdo vit duhet me u aktivizua për një kohë të caktuar edhe të paguhen varësisht për sa ditë janë të aktivizuar. Realisht deri sot nuk janë aktivizuar ka gati dy ose tri vite. Kam pasur komunikim me disa rezervistë që ma kanë shpjegua atë situatë edhe jemi tu shiku, kam bërë edhe pyetje e i kam marr edhe ankesat e tyre”, tha Berisha.
Tutje ai shtoi se për momentin është një numër i vogël i rezervistëve.
“Normalisht që ish dashtë rezervist që ka nevojë me i pas, por të kërkohen edhe vullnetarë. Diku ka 300 është numri i tyre dhe është numër i vogël, por nuk është e thënë që të tregohen të gjitha veprimet e ushtrisë, ata janë në alarm dhe janë të vetëdijshëm për situatën”, deklaroi Berisha.
Në anën tjetër njohësi i çështjeve për siguri në Kosovë, Avni Islami për arbresh.info tha se që nga momenti i sulmit të Ukrainës nga Rusia nuk ka më siguri.
Angazhimi i rezervistëve sipas Islamit është i domosdoshëm.
“Momentumi i ri i cili është kriju vetëm në Evropë edhe më gjerë duhet që strukturat e sigurisë të jenë aktive por që janë organet kompetente ato që përcaktojnë shkallën e rrezikshmërisë. Që nga momenti kur shteti i Rusisë e ka sulmu një vend sovran siç është Ukraina kanë rënë të gjitha marrëveshjet, traktatet dhe ligjet ndërkombëtare pra mund të jetë një model më i keq i mundshëm nga vendet e tjera. Secili vend duhet ta ketë parasysh pra edhe Kosova që duhet të investojë dhe të jetë e përgatitur për sulmet e mundshme. Ndërkaq në Kosovë secili sulm apo agresione i Serbisë konsiderohet sulm ndaj NATO-së, për fatin e pranisë së trupave të KFOR-it, por pavarësisht kësaj duhet që stërvitjet ti fillojnë edhe pjesa e rezervistëve të Forcës së Sigurisë së Kosovës”, tha Islami.
Tutje ai përmendi edhe idenë e kryeministrit Kurti për shërbimin ushtarak të detyrueshëm që sipas tij do duhej të ndahej një fond në mënyrë që çdo qytetarë të jetë i përgatitur në rast të ndonjë rreziku.
“Ideja e kryeministrit që ishte për shërbimin ushtarak të detyrueshëm të mendohet të ndahet shumë e caktuar dhe të arrihet deri te ajo pika ku secili qytetar i Republikës së Kosovës të jetë i gatshëm dhe i aftë në rast të ndonjë agresioni të mundshëm nga kushdo qoftë që të gjithë të jenë të aftë për përdorimin e armëve luftarake”, tha Islami.
Islami po ashtu theksoi se Ballkani është vatër e luftërave dhe se Kosova gjendet në zemër të saj andaj shërbimi ushtarak i detyrueshëm nuk duhet të jetë një pikëpyetje sipas tij.
“Shtetet më me ndikim në botë e kanë të detyruar ushtrinë e pse të mos jetë Kosova e cila gjendet në Ballkan e Ballkani njihet si vatër e luftërave të mëhershme e edhe sot konsiderohet si bombë e kurdisur” , deklaroi Islami.
Ministria e Mbrojtjes nuk ka treguar nëse rezervistët janë në alarm, apo i kanë aktivizuar pas zhvillimeve në Ukrainë.
Kujtojmë që së fundi 180 rekrutë të rinj i janë shtuar Forcës së Sigurisë së Kosovës, 12 prej të cilëve janë gra.
