Sekretari i Përgjithshëm i NATO-s, Jens Stoltenberg ka thënë se retorika bërthamore e presidentit rus, Vladimir Putin është e rrezikshme dhe e papërgjegjshme.
Stoltenberg tha se “kjo është retorikë e rrezikshme”, duke komentuar urdhrin e Putinit për t’i vendosur në gatishmëri të lartë forcat e parandalimit bërthamor.
“Zyrtarët e lartë të vendeve kryesore të NATO-s po bëjnë gjithashtu deklarata agresive kundër vendit tonë, prandaj urdhëroi Ministrin e Mbrojtjes dhe Shefin e Shtabit të Përgjithshëm të Forcave të Armatosura të RF të ngrënë forcat parandaluese të ushtrisë ruse në një regjim special”, tha Putin pas një takimi me ministrin e Mbrojtjes, Sergei Shoigu dhe shefin e Shtabit të Përgjithshëm të Forcave të Armatosura, Valery Gerasimov.
Reagimi i Shoigu ishte i prerë, pa vënë asgjë në diskutim. “Po, zotëri”. Ndërsa presidenti rus i quajti të paligjshme sanksionet e vendosura ndaj Rusisë.
Vënia në gatishmëri e forcave të parandalimit bërthamor, vjen pasi vendet udhëheqëse të NATO-s u bashkuan duke i vënë sanksione Rusisë për shkak të pushtimit të Ukrainës. Mbetet të shihet se cilat janë kartat tjera të Putin i cili aktualisht në botë po krahasohet me Hitlerin.
Shtetet e Bashkuara të Amerikës i janë përgjigjur urdhrit të presidentit Putin për vendosjen e forcave bërthamore të Rusisë në një gjendje gatishmërie “të veçantë”, raporton BBC.
Ambasadorja e SHBA-së në Kombet e Bashkuara, Linda Thomas-Greenfield, e quajti “të papranueshme” lëvizjen e Putinit, transmeton Gazeta Express.
“Kjo do të thotë se presidenti Putin po vazhdon të përshkallëzojë këtë luftë në një mënyrë që është krejtësisht e papranueshme dhe ne duhet të vazhdojmë t’i frenojmë veprimet e tij në mënyrën më të fortë të mundshme”, tha ajo.
