Shkruan: Daut Dauti
Në tërë hapësirën ish sovjetike dhe më gjërë, fjala çeçen është sinonim për frikën. Trimëria dhe aftësia e tyre për luftë është legjendare. Numerikisht janë popull i vogël, por gjatë historisë rusët kanë pësuar debakël me ta. Pas rënies së BRSS çeçenët me vite e kanë mbrojtur pavarësinë e vendit të tyre në mënyrën më heroike duke e poshtëruar ushtrinë ruse.
Tashti që Çeçenia është nën Rusinë, gjërat kanë ndryshuar. Putini ka krijuar qeveri kukull të këtij vendi që e udhëheq një njeri mizor i quajtur Kadirov. Kadirov e ka shndërruar lavdinë e Çeçenisë në turp.
Putini i dërgon çeçenët në Ukrainë kryesisht për të përhapur frikë te ukrainasit. Sipas përqindjes së popullsisë, numri i të mobilizuarve çeçenë, me iniciativën e Kadirovit, është me dhjetëra herë më i madh se i rusëve. Putini me çeçenët nuk e ka qëllimin vetëm për t’i frikësuar ukrainasit, por edhe për të bërë me dije se myslimanët janë me të dhe në anën tjetër duke i diskredituar pasi që dalin si egërsira. Por, nuk është i vogël as numri i çeçenëve që vullnetarisht i janë bashkuar ukrainasve kundër rusëve.
Çeçenët janë sikur suliotët. Askush nuk ua kalon për luftë. Tashti çeçenët kanë marrë rolin e suliotëve. Luftojnë për një vend që nuk ka të bëjë asgjë me ta. Popujt e vegjël shpesh përjetojnë tragjedi në ngjarjet e popujve të mëdhenj.
